繼為港發聲的鄭敬基離港到加拿大轉打國際戰線，聲言繼續抗爭後，憑電影《十年》、《樹大招風》分別贏得香港金像獎最佳電影和最佳導演的導演歐文傑亦如鄭敬基一樣，他於港版國安法實施前已隨妻子移民加拿大，到埗後隔離14日期間，歐文傑亦於twitter開新賬號發聲，他昨日留言：「係時候開始打國際線！」網民留言支持「海外手足導演」。
鄭敬基助搭路
歐文傑昨在fb寫道：「今日，有好多海外手足喺加拿大聲援香港，大家一齊唱願榮光……嗰一刻，我以為自己喺香港？聽佢哋講，有啲過咗嚟呢度嘅手足，為咗緊貼香港消息，𠵱家都仲係過緊香港時間生活？其實，真係手足嘅，去到邊都係手足，唔係手足嘅，喺香港都係平行時空？特此感謝前輩鄭敬基幫忙搭路，令我好快就已經融入咗溫哥華嘅華人圈子！亦好多謝各路英雄拔刀相助，謝謝大家的問候關心，很抱歉讓你們擔心了，我喺度再同大家報平安！謝謝你們！」
早前歐文傑接受傳媒訪問時曾透露避走加拿大是逼不得已：「我唔會叫移民，係『走佬』，因為走得好急，乜嘢都冇計劃，亦冇申請，太太係加拿大籍，佢擔心我，怕我講錯嘢，係好急咁買機票。」初到異地的歐文傑當然暫時未能繼續拍電影，不過他先思索作為香港人的定位︰「呢個時候究竟應該做啲乜呢？我覺得呢個身份係緊要。要先做一個人，再做一個電影人，唔會覺得拍戲最大，我哋想追求嘅一啲嘢可能緊要啲。」《十年》是抗爭電影，導演不為五斗米折腰，令香港人感動。
阿倫刪網避禍
撐抗爭的歐文傑獲網民大力支持，相反兩年前開始玩Ig、facebook的譚詠麟（阿倫），自撐警後卻日日遭大量網民洗版式留言鬧爆，加上他貼出與現任葵青警區指揮官謝振中合照，連累有份影相的梁漢文，日前阿倫索性暫時刪除Ig及facebook fan page，跟過萬粉絲斬纜。現在只玩微博的阿倫，雖然失去香港的忠粉，但變相多了內地粉絲支持。