英超賽季終於落幕，利物浦拎冠軍，曼城、車路士、曼聯前四，都不是本欄重點；最重要是找尋「好賭」球隊，今季黑馬錫菲聯（圖）就榮登英超贏盤王，但隨住復賽後戰績明顯下滑，如果新一季再有主力離隊，隨時由贏盤王變輸盤王。
以「讓球」盤計，錫菲聯今季38場聯賽累積24勝1和13輸，贏盤率63.2%，全季平注投注算有利潤，特別在季初，實力仍然被莊家低估時，頭14場聯賽竟然12贏2輸，作客車路士受讓一球/球半，結果賽和2:2，算是代表作。但自復賽後，球會似乎心知已過護級安全線，球隊走勢立即轉弱，最後三場更比分及盤路均輸，包括煞科戰1:3大敗予修咸頓。錫菲聯不貪心爭歐洲賽資格，算是明哲保身方法，畢竟之前如韋根、史篤城等，都當過英超黑馬，也獲過歐洲賽資格，結果難兼顧多邊戰線，最終降班收場。以錫菲聯人腳，今季初升班全憑職球員踢士氣波，高空轟炸戰術也不見得高明，對手下季適應後更難「偷雞」，不宜過份高估。
「讓球主客和」是本欄較少推介其中一個注項，畢竟「抽水率」較高，而且足智彩開盤更加進取，如利物浦、曼城等強豪，[-2]、[-3]已經常事。像曼城煞科戰主場5:0大勝諾域治，[-3]主勝看似輕鬆開出，但其實曼城今季5度[-3]只有兩次贏出，比率不高。又如冠軍利物浦，今季沒有[-3]，但15場[-2]比賽，也只有6場大勝3球或以上贏出，球迷過份迷信強隊攻力，一廂情願博強隊大炒，就會墮入莊家陷阱。
文：Goal進