鄭市長一周前發狠話，因應疫情會再加辣出招，又話世界各地都有禁足令。一錘定音，阿嬸醒水，呢次回歸理性冇搶廁紙大米。但六點鐘之後武肺會出動㗎嘛，一於買多些餸菜fusion，唔通day day粥，咁死悶咩。結果街市爆疫，衞生署叫師奶千祈唔好頻頻幫襯街市。今日連外賣員都中招，叫各區的一家之煮，點發辦呢？鄭市長只有底氣冇鑊氣，加了什麼辣？冇，只有發爛渣，賴人假傳「禁足令」，屈人「居心叵測」。
禁足，對象不應該是市民而係N種唔使檢疫當香港無掩雞籠的豁免人士。疫情中海員來港約有萬人，佔總數29萬豁疫者的一成都唔夠，到底邊種豁疫人士最高危？天后維景那一批「住客」，點檢？
萬不得已，鄭市長所謂的出招，是指內地醫護馳援團嗎？抑或，完勝策略，將武肺病患一律送中！聘鍾南山坐鎮主診。慶回歸稻香與富臨飯聚群組以至721唔見人的popo通通獲得第一線治療，康復出院之時，感恩南山，追問可否火線入黨的哽咽畫面，藍絲畀讚轉發過億次。慈雲山，長治久安改名慈南山。