美國國務卿蓬佩奧重用一位華裔美國人余茂春，視之為中國政策智囊，並冇因為余茂春來自中國大陸而Ban咗佢，體驗咗美國係一個移民國家，盡收天下英才而用之。特朗普上任後，下令針對新移民，收緊外國學生畢業後之H-1B工作簽證，實在非常短視，難怪美國科技界群起反對。喬布斯親生父親就是敍利亞移民，Google創辦人之一Sergey Brin係俄羅斯移民，微軟總裁與現在Google總裁都係印度移民，呢類人選擇留在美國而不返回祖國，益晒美國科技。
講番余茂春，相信美國政府對佢已經做咗大量背景審查工作，肯定不會是金無怠一類，先至對佢委以重任。好似余茂春一樣見解嘅美國學者，以前唔係冇，但生不逢時，由尼克遜訪華開始，政治觀點與基辛格相似嘅學者先至有運行，可以加入國務院，入白宮，即是話一啲親華派佔領大量高職，余茂春啲前輩盡入冷宮。係要到咗習近平上台，一反鄧小平之韜光養晦策略，改行「厲害了我的國」戰狼外交政策，驚醒歐美日，再有特朗普登台，美國啲鷹派才有機會出場。
或說，特朗普好有機會輸大選，民主黨拜登會唔會行番克林頓奧巴馬舊路，對華妥協？機會唔係冇，但時移世易，拜登與特朗普競爭，大打「反華牌」，上任後幾難即時轉軚，金融時報有一篇分析，講美國麥卡錫主義（1950年代初）盛行時，猶有反對聲音，美國人不慣一言堂，甚麼政策都有人反對，但金融時報留意到，今次特朗普蓬佩奧對華強硬（用蓬佩奧術語，反對CCP啫），全美一片靜寂，全無公開辯論可言，輿論反CCP一面倒，令觀察家覺得可怕。既然如此，即管拜登係下一任總統，余茂春一派嘅中國政策，已成美國主流意見，基辛格路線稱雄五十年，夠鐘落幕！特朗普蓬佩奧如認為大選輸硬，還有一招可出，逼拜登不能上任後轉軚。路透、紐時等引述不同消息人士講，白宮已有制裁中國／香港官員名單，只係暫時不用，必要時特朗普其實可以公開宣佈制裁CCP黨員，唔駛真係做全套嘅，只需公開講十位八位中國億萬富豪嘅名字，已經夠震撼。中國民企富豪不少係黨員，被美國制裁嘅話，影響好大，往來銀行一定騰雞。一旦宣佈，拜登怎敢解除，唯有照跟可也！