皇家馬德里前鋒賓施馬今季喺球隊表現出色，更當選皇馬今季最佳球員。賓施馬嘅表現更獲得法國足總主席勒格萊大讚，不過其實之前賓施馬同勒格萊就因為入選國家隊一事而不和，所以前者都喺網上作出回應。早喺2015年期間，賓施馬因為捲入涉嫌以色情影片勒索國家隊隊友華布拿嘅案件，被法國足總禁賽。當時勒格萊就話，唔會再俾賓施馬入選國家隊，令後者嘅國家隊生涯正式完結。賓施馬今次得到「稱讚」，只係喺twitter上面作出簡短回應：「得啖笑。」由呢三個字就可以睇得出佢哋嘅關係。同時由於賓施馬今季嘅表現太掂，法國國內開始有人質疑法國足總對賓施馬嘅懲罰，更有人討論賓施馬係咪應該重返國家隊。