上星期香港警察向公眾問咗一個問題：「你哋真係咁憎我哋？」呢句嚟自佢哋套《暗夜星辰》「紀錄片」對白，答案顯而易見，更引發社交網站出現一個「係」字或加埋一堆助語詞嘅洗版潮。八方發現PoPo已經將呢條負皮遠遠拋離正評嘅「紀錄片」喺YouTube下架，不過奇就奇在好快再重新上載，實行以「重溫」為名，達到清洗負皮同留言嘅客觀效果。
依然「令部份觀眾反感」
《暗夜星辰》首播後一日，喺YouTube負皮已過萬，同時俾YouTube列為「社群認為下列內容不當或可能令部份觀眾反感」，八方上星期講完冇耐，條首播片就突然喺YouTube消失，喺香港警察fb專頁上嘅帖文，結果都一樣。不過，YouTube不久有另一條【網上重溫•《暗夜星辰》】嘅影片上載，但似乎無助PoPo改寫結果，經過周末後，新片負皮再次拋離讚好，留言亦一面倒，加上疑似出現太多投訴，YouTube照將影片列為「令部份觀眾反感」同「設有年齡限制」。
仲有件事必須指出，喺《暗夜星辰》開頭，有個叫「阿安」嘅速龍小隊人員聲稱自己「拉咗好多『勇武派』」，仲話「上到車，先知佢得16歲，我望住佢，𡃁仔你知唔知道自己做緊乜呀？佢哋答我哋唔到。」但根據指引，未成年人士必須喺監護人陪同下執法人員先可以錄口供，以及有權保持緘默，唔知「阿安」呢個算唔算係錄口供呢？
李八方
