辛尼特喺上禮拜六俄羅斯盃決賽以1:0小勝俄甲嘅奇姆基第5度捧盃，但球隊喺球場上慶祝嘅時候就出現咗令人尷尬嘅畫面，隊長伊雲洛域高舉獎盃時唔小心跌咗個獎盃，而個玻璃蓋仲因為咁而打爛咗。月初已經成功衞冕俄超嘅辛尼特，上禮拜六憑住迪斯尤巴喺84分鐘射入12碼一箭定江山，以1:0擊敗奇姆基再奪俄羅斯盃，首次成為聯賽同盃賽雙冠王。不過，當辛尼特球員同埋職員喺頒獎台旁邊興奮慶祝時，曾經踢過車路士嘅隊長伊雲洛域高舉獎盃時竟然唔小心將獎盃跌咗落地，獎盃嘅玻璃蓋隨即打爛，場面尷尬。辛尼特其後喺twitter上載咗相關片段道歉︰「你哋都知道我哋成功打爛咗俄羅斯盃，我哋要講聲對唔住！」