ESPN報道，上個禮拜五喺法國盃決賽畀對手剷傷嘅巴黎聖日耳門（PSG）前鋒基利安麥巴比，可能無緣喺下月12日對阿特蘭大嘅歐聯八強賽事上陣。PSG雖然藉住尼馬嘅入球以1:0擊敗聖伊天，第13次捧走法國盃，但前鋒麥巴比喺上半場26分鐘畀對方隊長盧斯佩連剷傷，要即時退下火線，賽後更加要撐住拐杖參加頒獎禮。經過多次檢查初步證實足踝傷勢唔輕，但好彩未有傷及韌帶。麥巴比目前仍要着上保護靴，嚟緊星期二會再接受檢查，去進一步確認傷勢。雖然勢將缺陣一段時間，但麥巴比嘅心情仍然相當唔錯，上禮拜六更透過ig報平安，佢話捧盃嘅感覺真係好正，又話球迷嘅打氣留言令佢好感動。