港府抗疫無能，搞到武肺第三波大爆發，大家有更多時間留喺屋企，鍵戰閒人689喺社交網絡上嘅出帖頻密度大幅提高，以噚日為例，連發八帖文，包括下晝4點多後一個鐘內連作出六連發，令一眾五毛黨汗顏。
689噚日啲帖文中就有兩則引起八方注意，其中一則，佢作為《蘋果日報》紙本最忠實讀者將本報國際版貼堂，留言叫大家要求「香港#記者協會」公開譴責美國政府，事關報道關於聯合國促美停對記者動武。記協全稱「香港記者協會」，689刻意將「香港」分離未知用意為何？但八方就睇到，原來喺689眼中，執法人員對記者動武係應被譴責，唔通佢都咁睇香港班警察？
至於另一則帖文，689睇唔過眼美國警察所作所為，要求公民黨同其他泛民出聲呼籲特區政府制裁美國，同要求中國廠商停向美國警察出售裝備。既然可以帶頭向美國「亮劍」，八方就唔明689點解自己唔坐言起行，又或者叫建制派去做，點解要叫泛民？唔通信唔過建制派？但更加諗唔通，究竟中國廠商向美國警察賣過咩裝備呢？