【本報訊】「嗰個醫生（聯合醫院）問我，你有冇食飯食咗呢啲嘢（金屬線）落去……食呢條嘢落去都係入腸啫，冇理由喺呢啲位。」梁伯因患有心瓣膜病，出現二尖瓣老化，去年11月在伊利沙伯醫院接受開胸二尖瓣置換手術，本月初發現「刮手」膿瘡，揭發膿瘡位置有一條近20厘米長金屬線，其子質疑老父今次腹部驚現金屬線，極可能與去年底心臟手術有關。有心臟科專科醫生推斷金屬線為「起搏金屬線」，遺留在人體屬嚴重疏忽。
「我以前聽過，做手術會有把鉗、又話鎚仔，又話咳吓會爆線，我對呢啲手術好大陰影。」梁伯揭高上衣，向記者展示手術後胸口留下的疤痕，他坦言換心瓣後「行路中氣好咗」，但萬料不到手術後八個月竟發現金屬線留在體內，大嘆倒楣 。
梁伯稱，今年4月發現肚臍對上長有一粒小膿瘡，他以為只是小事一樁，自行擠出膿液後不了了之，惟傷口持續兩個多月仍未埋口，「約兩個半月前有膿，擠膿出嚟後按實會痛，唔知點解唔埋口。」
求醫遭質疑自己吞落肚
他雖感奇怪但未有告訴子女，直至本月7日洗澡，竟發現傷口刮手，大驚下到聯合醫院求醫，「（聯合急症室） 佢同我照超聲波，三個醫生唔敢扯出嚟，後來有個醫生就夠膽扯出嚟……開頭以為得幾厘米，原來條線差唔多20厘米。」
對梁伯年底再到公院做手術，兒子直言有陰影，他指父親去年診斷出前列腺肥大，「每隔六至七個鐘都要放尿，好唔方便」，需進行手術，惟檢查期間發現心臟二尖瓣老化，要進行換人工心瓣手術，才可再排期進行前列腺手術，相關手術將於今年12月在伊院進行，令梁氏一家憂心不已。「你話佢係咪黐線，係咪懵，食飯食落去？有冇常識呀大佬，喺個肚走出嚟，即插穿個胃，由個胃走出嚟，特登揾條線食落肚，佢白癡？儍嘅。」兒子對當日急症室有醫生質疑父親吞下金屬線說法十分不滿。
伊院回覆指事件中病人「去年11月11日因主動脈及二尖瓣狹窄，安排入院進行手術更換人工主動脈瓣及二尖瓣，手術於 11月12日順利完成，醫院一直為病人提供所需要治療，其後病人轉送聯合醫院跟進治療，並安排病人之後繼續覆診跟進病情。醫院手術後未收到異常報告，亦未有收到其他醫院報告事項，無法評論有關個案。」
專科醫生：主刀責無旁貸
至於為何金屬線在梁伯身上出現，有心臟科專科醫生估計，或是負責抽出金屬線的醫生出錯，在取走體外起搏器後忘記取出金屬線；另一可能是有人誤以為該金屬線「係溶得嘅」，可在體內分解，但無論如何遺留物件在病者體內都屬嚴重疏忽。
他審視過金屬線相片，據金屬線長度、顏色和有一小截金屬線外露的特徵，估計該金屬線是貼附於心臟肌肉，藉以傳遞起搏電流的起搏金屬線。另一醫生指疏忽責任在主刀醫生身上，「佢負責晒所有嘢……但係剪嗰個人當然亦都要負責。」他估計若病人就事故投訴，很大機會「要上council（醫委會）」。