西乙球隊富恩拉巴達（圖）證實，隊入面再有12人確診武漢肺炎，全隊感染武肺嘅總人數已經達到28人。富拉巴達原本喺上禮拜一（20日）最後一輪西乙聯賽作客拉科魯尼亞，但因為有幾個球員確診，比賽要延期舉行。喺富恩拉巴達最近12個個案裏面，有八人係嚟自目前正喺拉科魯尼亞隔離嘅一隊球員同埋教練團成員，另外四人就喺球會嘅馬德里基地確診。富恩拉巴達上個禮拜六發表聲明話︰「最新一輪檢測顯示總共有28宗陽性個案後，我哋感到好痛心同埋憂慮。𠵱家有12宗新個案，四宗馬德里嘅個案由7月17日開始已經開始隔離緊；而其餘八宗自7月18日以嚟都喺房間隔離並一直呈陰性，但今日佢哋嘅檢測結果都喺呈陽性。」