效力西甲球會巴塞隆拿嘅阿根廷球王美斯，再次發揮佢「球霸」嘅本色。據英國《太陽報》爆料，美斯日前向會方施壓，「欽點」啱啱帶領列斯聯重返英超嘅領隊比爾沙，取代同佢不和嘅施迪安，喺下季出任巴塞教練一職。
報道話美斯已要求會方用盡一切辦法，說服比爾沙離開列斯聯接任巴塞教練，特別係巴塞今季衞冕西甲失敗，近年喺轉會市場又亂買人，啲新兵成日都雷聲大雨點小。美斯就深信，今年65歲嘅比爾沙將可解決巴塞種種問題，因為佢做列斯聯領隊時都係困難重重，但最終排除萬難，成功帶領列斯聯返上英超。
未同列斯續約有得傾
搵比爾沙加盟對巴塞嚟講並唔係不可能嘅任務，原因係比爾沙月底就同列斯聯約滿，到𠵱家都仲未續約。加上比爾沙對西甲都唔陌生，曾教過愛斯賓奴之餘，2011至13年仲教過畢爾包，成績唔錯。加上有美斯加持，巴塞就希望動之以情，力邀佢加盟。
其實喺巴塞做教頭，冇「球霸」美斯點頭真係唔容易。好似今季咁，教練華維迪就因為搞唔掂班球員，季中要走人。換前貝迪斯教練施迪安接手，好快又傳出佢同美斯為首嘅主將唔妥，美斯仲話佢戰術唔掂，咁樣贏唔到歐聯。另外，美斯同球會主席巴杜美嘅罵戰已經唔係新聞。就連球員買賣都歸佢管，美斯已經開到口，要求巴塞由法甲巴黎聖日耳門買尼馬返嚟。近年佢更變本加厲，一旦唔如佢意，冇幾耐就會傳出佢唔續約離開巴塞嘅新聞。
巴塞季尾清洗12人
或者正因為咁，巴塞今夏就會大清洗，籌錢買尼馬同其他新援。西班牙《馬卡報》就話巴塞想出售12名球員，仲有埋名單。12人之中，巴塞相信只要價錢合理，今季借用卡利斯艾蘭拿同拉芬拿艾簡達拿嘅貝迪斯同切爾達，會買斷佢哋兩個。尼爾遜施美度、奧士文尼迪比利同祖尼亞費普，就會用嚟換交新球員，好似迪比利咁，巴塞就希望可以用佢再加錢，換尼馬返嚟滿足美斯。拿傑迪錫同維達爾都30出頭，但以佢哋嘅實力應該仲有買家。不過尼圖、烏姆迪迪、巴夫韋迪同菲臘比古天奴等人，除非巴塞肯大減價，否則要賣走佢哋真係唔易。