上個月宣佈結束綜合格鬥（MMA）生涯、外號「寸嘴格鬥王」嘅愛爾蘭拳王麥基格（圖），上禮拜六喺ig貼出幾條自己喺草地踢波嘅片段，着上牛仔褲嘅佢用左腳將個波勁射入網，皇家馬德里隊長沙治奧拉莫斯（小圖）都喺留言度回應，邀請佢去皇馬出席訓練。麥基格上禮拜六去到家鄉愛爾蘭一間當地球會Black Forge FC踢波，佢喺ig上載咗幾條射門影片，似乎想話俾大家知，自己喺擂台之外亦都擅長其他運動。慣用左腳嘅佢控定粒波後，就大力射入網角，現場吸引咗唔少人圍觀，並傳出一陣歡呼聲，其餘幾段影片亦可見佢撻Q、中柱。佢標籤咗拉莫斯嘅賬號話：「你覺得點？」，呢位皇馬隊長就覆佢：「非常好，我嘅朋友！想唔想嚟皇馬出席操練？歡迎你隨時過嚟！」早前拉莫斯喺皇馬訓練射入一球後，就扮麥基格喺擂台上大搖大擺嘅勝利動作「Billi strut」，仲將相片上載至ig問麥基格「覺得點」，今次就輪到呢位愛爾蘭拳王作出回應。