上周五意乙上演尾三輪賽事，其中一場係AC米蘭傳奇對決，由著名射手恩沙基帶領嘅賓尼雲圖，作客由鐵衞尼斯達帶領嘅費辛隆尼。結果已帶領球隊穩奪意乙冠軍兼升班資格嘅恩沙基，並冇因昔日情義心軟，作客照以3:2擊敗尼斯達嘅費辛隆尼。從網上嘅相片顯示，兩名前米蘭隊友賽前都有傾兩句，傾傾吓仲攬埋一齊。賽後賓尼雲圖繼續喺意乙榜首領放，全失3分嘅費辛隆尼排喺第5位，雖然直接升班無望，但仲有機會力保前六踢附加賽，如果費辛隆尼最後可以升班，下季大家就可以喺意甲睇到恩沙基同尼斯達再次大鬥法。同日克羅托內5:1大炒利禾奴，攞到意乙第二個直接升班資格。