Super Girls成員陳穎欣（Yanny）和徐頴堃（Erica）參演的ViuTV劇集《地產仔》前晚大結局，坊間對劇集評價不一。早前二人在旺角接受訪問，Yanny大讚拍攝該劇很好玩：「呢個劇係瘋狂喜劇，用好多卡通漫畫元素，喺現場演員又好多爆肚、無厘頭嘅情況，我同Erica嘅角色實啲，但我同令狐飛（吳肇軒飾）嘅時候，就會小鳥依人甜啲。」她又謂希望挑戰不同的角色如《食神》中的火雞姐，或江湖味重的「洪興十三妹」一角。
Erica出身演藝世家，她是徐少強和雪梨的女兒、米雪的姨甥女、徐偉棟的妹妹，不過性格獨立，並沒有刻意問家人意見，她說：「我會慢慢學，就算佢哋講咗我未到嗰個位都做唔到，要自己諗辦法。媽咪有睇過我做戲，覺得我上鏡淡定，但唔會講太多，畀我自由發展。」
