美國佬真係冇鬼用，係威係勢話要摺埋侯斯頓中國領事館，結果不但眼白白睇住人家以熊熊烈火燒文件都不敢闖進去蒐集犯罪證據，甚至被譽為「間諜之家」的那個蔡姓總領事揚言企硬不走，也沒有即時揮舞堀頭掃把掃佢出門，其優柔寡斷軟弱無能使人驚訝，極權國家老百姓看在眼裏，不禁搖頭嘆息，深深慶幸自己不是生活在如此缺乏辦大事毅力的地頭。既然冇本事鐵起心將所謂人民公敵往死裏打，學乜人咁大聲講嘢吖，敲鑼打鼓搞咗幾日，唯一落對方面的，只不過令全世界見到那座似足殯儀館的建築物有幾肉酸。呢嗱，中國就唔同嘞，請參考成都的漂亮處理，一宣佈限期三日關閉美國領事館，武警即刻封路，市民傾巢而出自動自發圍堵，左一句「一個都不准出來」，右一句「馬上給我他媽的滾回老家」，教躲在裏頭的窩囊洋漢洋婦無所適從，走也不是留也不是。
據說還有人當街燒炮仗送瘟神哩，簡直加插傳統民間藝術表演，使館工作人員他日返到祖家，眉飛色舞向鄉親轉述，三日三夜講不完。時常感應神秘「共時性」的我，不遲不早讀了一篇上海作家蘇青寫於三四十年代的散文《搬家》，文青小鴛鴦受不了二房東嘴臉，挨年近晚準備搬竇，竟被惡毒的老太婆無理留難，找來幾個爛仔要他們多交三個月空租才准離開，幸好路遇貴人出手相助，才總算化險為夷。好不容易行李上了貨車，以為就此脫離苦海，誰不知還有彩蛋：「當車子轉彎時，我們回頭望見那個二房東正在後門口燒白紙」。哈哈哈，那當然是送瘟神的一種，所謂白紙，應該係溪錢啲friend。