上周五上演嘅法足盃決賽，巴黎聖日耳門（PSG）憑住尼馬喺上半場嘅入球，以1:0小勝10人應戰嘅聖伊天，第13次捧走呢項錦標。不過成場波嘅焦點，就肯定係PSG嘅基利安麥巴比，俾對手隊長盧斯佩連鏟傷退下火線，雙方球員仲為此大打出手。最大鑊係成班入場球迷又唔戴罩又圍住慶祝，真係要小心步啱啱宣佈確診嘅巴塞隆拿傳奇中場沙維後塵呀！
法甲三月中就開始停擺，但PSG嘅近況又好似唔錯，喺對上2場友誼賽先派咗9隻光蛋畀法乙嘅勒哈弗爾，之後又以4:0大破蘇超班霸些路迪，點知一打真軍就爭啲出事，聖伊天嘅丹尼斯布安加開賽初段射中柱，爭啲就可以先開紀錄，好彩踢到14分鐘，麥巴比喺禁區內勁射被對方門將慕連撲出後，尼馬喺龍門口成功執死雞，幫球隊打破僵局。
麥巴比傷出眼濕濕
不過全場最驚險嘅鏡頭發生喺26分鐘，麥巴比喺前場右路接應隊友直線，準備加速之際，就俾盧斯佩連鏟跌，兩隊球員即時互相推撞。球證原本只係以黃牌警告盧斯佩連，但翻睇VAR之後就改以紅牌直接將佢趕出場。擾攘一輪之後，麥巴比都要退下火線。場波之後充滿火藥味，球證全場出示咗10黃1紅。PSG最終亦以一球險勝對手，繼贏得法甲聯賽後，袋走今季第二項錦標。
被調離場時眼濕濕嘅麥巴比，之後都有撐住枴杖參加頒獎禮。PSG教練杜曹就話，要等檢查過後先知佢傷得幾重。PSG嚟緊星期五就會喺法國聯賽盃決賽硬撼里昂，下個月就會飛去葡萄牙里斯本，同阿特蘭大爭入歐聯四強，到時唔知呢位主將有冇得上陣。
沙維無大礙要隔離
今季法甲同法乙已因為武漢肺炎疫情腰斬，呢場法足盃決賽就係當地四個月以嚟嘅第一場正式比賽，場波原本可以畀5,000個球迷入場，但美聯社就話實際上只有大約得2,800名現場觀眾，但唔少球迷都冇戴口罩，亦冇保持適當社交距離，一個唔覺意真係隨時中招。
唔係危言聳聽呀，因為目前喺卡塔爾教緊當地球隊艾薩德嘅巴塞隆拿傳奇中場沙維，上周六就喺twitter自爆，早幾日做完武肺病毒測試，證實自己都領咗嘢。佢話雖然自己冇乜唔妥，但都要自我隔離，直到完全好番為止。佢仲叫各位球迷都要好好保重，希望可以盡快返番球場同大家見面。