上周英資行滙豐發生兩件事，兩件事政治上不應共存，但就發生了。一單係加強對泛民關連人士戶口審查，看似幫港府「做嘢」；另一單係被官媒高調炮轟滙豐在華為事件上的「二五仔」角色，得失中共。路透上周一報道指包括滙豐等大型銀行喺國安法實施後，正擴大審查客人政治上的羈絆；其實同時間港府及內地官員不能倖免，戶口同樣會俾銀行大力due diliegence。
不過唔知點解路透編輯特別將泛民起題，而讀者睇完題未必睇內文，令到好似得佢哋俾人查，其他政治人士就冇事；而黃之鋒就特別將自己俾滙豐查的經歷寫上fb，大罵白色恐怖及政治動機。
本總裁講過唔止一次，政治人士喺銀行被稱為politically exposed persons，由於洗錢風險較高，不限泛民、建制、政府官員，銀行對呢班人都敬而遠之。聽聞滙豐真心唔想同泛民有轇轕，其一係佢只想做生意，其二係驚紅燒獅子頭又出現。
好喇，事實係件事又得失咗香港泛民人士，滙豐理應多返建制派粉絲啩？
前日官媒《人民日報》突如其來大篇評論文章炮轟滙豐，內容都係話滙豐訛稱唔知客戶華為同伊朗有業務來往，將太子女孟晚舟擺上枱咁話。
有甚麼慘得過一間銀行被夾在西方與中共之間，被雙方上下其手，以抽水抽得越多為樂？如滙豐忍氣吞聲，最終只會被快速抽乾水，最終股東受害。
本總裁曾提出滙豐將考慮遷冊上海，甚至笑稱可改名SHBC，在未來局勢發展，這個預計越來越真實，相信遷冊、分拆、改名都即將或已出現在董事會議議程。股市上有所謂待變狀態，當爭持至一段時間，到某一個位只能選擇一條路，一係爆升，一係暴跌，滙豐亦處歷史關口，政治路向只能選擇向左走或向右走。
最後參考中資公司字節跳動政治變奏例子，當印度6月封殺當地紅爆TikTok，字節跳動為保TikTok國際間的政治正確地位，避免另一個蓬勃發展的美國市場都被封殺，7月初公然稱因國安法在港實行，毅然撤出本地業務，此乃平息西方情緒；留低大佬「抖音」在港serve香港人，此乃奉行一國一制，TikTok、抖音都係同一個老母，呢招滙豐董事局或可參考。
程總裁
http://fb.com/IFC89