近星期收到不同藍絲傳來一篇「震驚了，厲害了」樣板文字，因左丁山對科技認識麻麻，細讀一遍，知道一位沈向洋博士（Harry Shum）在美國科技公司好有名氣，今年54歲，江蘇人，畢業於東南大學、香港大學碩士、美國卡內基梅隆大學博士、電腦科學專家，讀書時係一位學霸，1996年攞到博士學位後，就由另一位大陸科學家陸奇介紹入咗微軟；2004年任微軟亞洲研究院院長……好嘞，呢位沈博士有輝煌紀錄，去年年尾宣佈辭職離開微軟，2020年3月接受北京清華大學聘書做高等研究院教授。
乖乖不得了，內地寫作，本地藍絲廣推嘅文字：「他是美國所有巨頭公司裏職位最高的中國人，也是矽谷科技圈最有權勢的中國人……竟在危險疫情期效力祖國，他，就是沈向洋……」又有YouTuber宣稱：「微軟副總裁離開美國，美國將在AI或損失8,000億，蓋茨痛矣！」
左丁山睇到嚇咗一驚，連忙搵電腦界人士問一問，佢地嘅反應係，沈向洋係AI頂尖高手，但返回中國並不表示佢係另一位錢學森：「沈向洋在微軟創作Bing搜尋器，結果輸咗九條街，冇乜人用。一位頂尖科技專才回國啫，駛唔駛講到咁誇張？如此吹噓沈向洋，其實係害佢！」不過藍絲呢排時興反美帝，唔會諗得咁深入嘅嘞。
沈向洋回國被視為愛國英雄，另一位57歲安徽人，22歲到美國，在柏克萊取得博士學位，成為美國海軍學院歷史教授，專門教中國軍事史、中國研究，佢多年來在美國寫文章指中國共產黨與中國文化，中國人民有差異，應不同看待，講咗好多年，冇人理。但最近幾個月美國國務卿蓬佩奧，大罵CCP，將CCP與China劃分，點解會咁？前幾日蘋果日報就提及一位余茂春（Miles Yiu）教授，余教授被蓬佩奧睇中，從海軍學院借用到國務院做Policy Painning，專攻中國政策，即是做咗蓬佩奧對華政策智囊。呢位余教授好愛國，愛美國也，佢話1980年偷聽美國之音，聽到列根總統演講，於是傾慕美國，1985年就去咗美國讀書，受89年天安門事件刺激好大，決定留美做美國人。估唔到今天成為國務院頭號「反共政策專家」，環球時報胡錫進稱之為「漢奸」。兩位年紀差不多嘅留美博士，點解取向咁不同？可能係：一位讀歷史，一位讀電腦，毛澤東憎死文史哲知識分子，理由在此！