訪問前一晚，陳志雲YouTube頻道內的節目《Stephen．傾》，原先安排了梁漢文做嘉賓，因為合照風雲臨時甩底了！陳志雲隨機應變，易服上陣化身Margaret Elizabeth Dunn登場。
扮女人當然難不到陳志雲，更難的人生難關，他都關關過。自家頻道開播三個月剛過六萬訂閱，以往無綫一點收視是6.55萬人收看，當然不能比，但看《Stephen．傾》內陳志雲的貼地氣，比《志雲飯局》陳總的高高在上，來得動人。
陳志雲說，他最想做的主題是「死過翻生」。「我想講死亡，嗰種叫near death experience，所謂死過翻生！」他經歷過，「梗係七年官司啦，嗰七年係好大嘅折騰同折磨。」
浴火重生，最新角色名叫Margaret Elizabeth Dunn，陳志雲說：「我扮隻鬼」！其實戴卓爾夫人也叫瑪嘉烈，大師都可以是鐵娘子。
撰文：文嘉龍
攝影：周樂恒
不得好死係好惡毒
經歴有如死過翻生，陳志雲驚死？「一定會驚。其實我最驚個過程辛唔辛苦，即係『好死』！所以人哋話你不得好死，係好惡毒㗎！睇你收尾嗰兩年，真係好惡毒。如果你係好死，你幾時死都冇乜所謂！」
當年的涉貪官司打足七年，終極上訴終還陳志雲清白，也令他身心折騰。「我當時所採取嘅態度，心理上準備到最壞，然後自己盡量做到最好。我交咗畀律師之後，我冇再去理成件事，我所做只能夠祈禱，甚至到最後，上訴庭話要地方法院判，我理解到如果真係判監，你所有有繩嘅嘢都唔可以戴，所以嗰日我冇戴褲頭帶、我冇戴呔，我着咗一件樽領冷衫，鞋亦都冇鞋帶，我係prepare for the worst，準備最壞。」
作最壞打算，望最好的尚未來臨。陳志雲說，很多人問他是否嘗盡人情冷暖，他內心計過度過，原來，冷的少。「十個可能有一個啦，大部份都係好㗎！有啲就金錢上支持啦，我冇要到！現兜兜拎啲錢過嚟塞50萬畀你，我仲驚過佢呀！」
不在其位。陳志雲清楚知道，那些年的所謂前呼後擁，不是因為他是陳志雲，「我一直都提住自己，當你喺嗰個位嘅時候，嗰啲同你好，或者同你前呼後擁嗰啲人，唔係因為你係邊個，係因為你個位啫！所以你個位冇咗，佢哋唔搵你，係最正常不過！可能之前我有呢個心理準備，所以我就覺得冇乜嘢；反而我好欣賞，我唔喺嗰個位，仲搵我嗰啲人，你可以話我自欺欺人，但我覺得係我正能量嘅來源囉！」
對劃清界線的人，現在說來不痛也不癢，「以前有一個artist朋友，佢好好嘅，以前，可以話係噓寒問暖，今日天氣凍喎，你着多件衫，佢都會text吓你，但係後來發生咗呢件事，記者問佢回應，佢話『我冇陳生電話呀』！我又唔會怪佢喎，因為佢仲喺嗰個機構做緊，佢又唔知你最終有冇事，佢會驚受牽連，咪同你劃咗條界先囉！」陳志雲沒有開名，但真的假不了，當年說出「我冇陳生電話」六粒大字的，正是林峯。
有得揀先至係老闆
話鋒一轉，志雲大師將劃清界線又轉移到梁漢文身上。「不過有時有啲人就唔敢劃囉，譬如梁漢文又唔同譚詠麟劃清條界線！大佬，我覺得譚詠麟今次真係離晒譜呀，有乜理由，你做人前輩你都知啦，唔好講政見，你知你坐喺隔籬嗰位謝先生（現任葵青區指揮官謝振中）幾受歡迎㗎啦，尤其是對年輕一代，你就唔好掹呢一個歌手落嚟啦！你上咗岸啫，人哋未上岸㗎，就算影咗張相都唔好擺喺社交媒體啦，你真係累親人呀！」
陳志雲都未上岸，這十年間反而做得更多更廣，「我係the show must go on，等如我喺ICAC俾人拘捕咗之後，佢放返我出嚟，我都要去講talk，因為我應承咗人，我就要做，我點可以唔做呢？因為我以前細個，我好唔鍾意啲大人，明明應承咗帶我去公園玩，跟住唔帶，你令我有期望，我落空喎，我真係好唔鍾意呢種感覺！等如𠵱家我鍾意打麻雀，如果啲人應承咗我打麻雀而唔嚟，我就會好嬲囉，哈哈哈哈哈！」
陳氏招牌高音笑聲，如今當然可以笑看風雲，但回想當年漫長的官司折騰，令陳志雲對當刻香港的現況有更深體會，「所以我好明白，𠵱家捉晒嗰啲人，我唔講話係又告唔係又告啦，有啲告咗佢都撤控，其實對佢哋心理上係好大折磨，因為你唔知呀！Uncertainty！等於國際局勢都係，港區國安法都係，你未通過嘅時候，大家好多uncertainty，𠵱家通過咗之後，雖然有好多人好憂慮，但係冇咗個uncertainty，又係真㗎喎！你知道咗，咁你自己決定你自己係點，有啲人唔怕，我繼續做；有啲人就直頭唔做，我走，你可以做一個決定，當你唔知嘅時候，恐懼憂慮同壓力就係最大！」
The show must go on的陳志雲，面對「港版國安法」，依然繼續做，每日一條時事短評放上網，他說：「我講嗰啲又唔係分裂國家、煽動國家，我有時甚至係讚政府做得好㖭，有乜問題呢？我今日預備錄嗰個就係鬧美國政府，哈哈哈！冇問題喎，我覺得佢哋應該畀個唔知金銀銅紫荊嗰啲我㖭呀，哈哈哈！」他要繼續發聲，「我哋老闆（商台主席何驥）同我哋講，佢話我哋要stay strong同埋要講事實，講真相好緊要，千祈唔好自我審查！」
陳志雲冇諗過走？「咁又唔係喎，我睇吓點啦，如果香港嘅空間，你要呼吸嘅空間都冇嘅時候，你唔走都唔得，你會死㗎喎！我唔係叫你走，好似曾蔭權以前講『有得揀，先至係老闆』，我要知道晒所有選擇，我去唔去係一件事，我鍾唔鍾意走係一件事。移民係一件好難做嘅決定，你𠵱家叫我走，我都有萬般捨不得，除非逼不得已！你連根拔㗎，我見開嘅人、我嘅麻雀腳，唔通人哋搭十幾個鐘頭飛機呀，雖然𠵱家通訊軟件好方便，打麻雀都有online，但係唔同㗎，online永遠都取締唔到offline！」
我做特首大家就開心
如果真的要走，何處是下一站？「首先英國係一個我好熟悉嘅地方，我喺嗰度讀過書，我喺嗰度做過好多年嘢，我都有表弟喺嗰度，但係我冇朋友。同埋或多或少，你始終都係second class，你唔係嗰個民族，就算佢哋話好平等對你，因為你嘅語言，無論你講得幾好嘅英文，都唔係你嘅母語，你點都蝕底好多！不過對我嚟講可能係好啲，我想做嘢都冇得做啦，退休年齡，唔係喎，佢哋好似做到65，咁得幾年！」
今年61歲的陳志雲，他的CV，很多香港人都很熟悉。1981年港大一級榮譽畢業的他，同年獲聘任政務主任，邱騰華就是他同屆大學同學和同屆政務官，林鄭月娥則是高他一屆的港大師姊。如果陳志雲仍在官場，可能位至特首？「𠵱家我唔做得咩，我唔去競選咋嘛！我都話我唯一一個理由想做特首，就係我想住禮賓府，而且喺中環，可以日日party，我做特首大家就開心喇，可以借地方畀人做吓話劇做吓演唱會，《Stephen．傾》晚晚喺嗰度做呀，起碼帶到歡樂畀人吖！冇得咁諗，我未必適應到囉，所以我話Carrie Lam叻囉，我哋都共事過一個部門，應該係醫務衞生署，不過就冇乜接觸。」
廣播處長啱做？「唔得！咁低級！廣播處長唔係好高級㗎咋！廣播處長唔係真係一個處長，佢係一個台長，人哋外國聽到Director of Boardcasting，以為佢係做廣播政策，其實唔係，佢都係好重要，但佢係一個台長，我話低級就係講笑啫，但的確唔係好高級，哈哈哈，好賤咁樣講！」
職場上的陳志雲從來是高級人物，雖然如今不再是一人之下萬人之上的陳總，但現在每朝早開咪出發，再到經營自己的YouTube頻道，起碼說的都是「人話」。「𠵱家做官，你一定要講官話，我唔係唔識講，但係𠵱家做官好似要冇埋自己意見，你唔可以同政府唱反調！」
即使現在自家頻道的《Stephen．傾》，規格不如《志雲飯局》大陣仗，來賓不是官商名流，而是在小窩室唱歌傾偈的新生代音樂人，「等啲成年人可以更加了解年輕一代，好多人話𠵱家年輕一代冇理想，甚至係廢青，其實唔係囉，就算係一啲比較激進，佢哋都好有理想，我自己平時做《在晴朗的一天出發》，我哋都訪問好多行得好前嘅所謂『抗爭者』，我完全唔認為佢哋係俾人唆擺喎，佢係有自己一套論述，你同唔同意係另外一件事，我覺得年輕人就係咁！」
大師落入凡間與年輕人接軌，人話總比官腔動聽。
【後記】王喜
梁漢文甩底，陳志雲一call即到的救命鐘，王喜永遠在場。不離不棄，多年來王喜都榜上有名。
陳志雲說：「佢個人好怪，你衰呢，佢就好啲，唔知係咪佢覺得自己優越啲呢，哈哈哈！不過佢係一個好好嘅人，雖然佢啲脾氣係好古怪，因為我見過佢，佢唔係做畀你睇㗎，佢見到一個駝背嘅伯爺公過馬路行得好慢，佢忽然間衝前去扶人哋，佢係嗰種路見不平，佢就會衝埋去嗰隻！佢嘅脾氣就好似以前湊大我嘅阿姑咁囉，總之你係弱者，佢就出嚟幫咗你先，阿喜都係咁，佢試過問我借車去畀人做喪事，佢問我介唔介意，你都問咗我咯，點介意啫！」
死過翻生都齊上齊落，無憾！
場地提供：柏斯琴行