現年27歲的余香凝（Jennifer）過去曾被電視觀眾狠批演技差，她自言睇完批評「個心沉咗一吓」，猶幸她知恥近乎勇，去年演技大躍進，憑電影《非同凡響》提名香港電影金像獎最佳女主角，雖然最終落敗，但她開心演技得到認同，更以林嘉欣、李心潔為目標，希望演藝事業與家庭並存，渴望30歲前結婚生仔。
余香凝對於演技被批評，她日前接受本報記者專訪時表示視批評為動力：「批評嘅聲音我會睇晒，睇完當然個心沉咗一吓，但我接受，問自己係咪真係做得唔夠好，好多時自以為個角色設計好，但係原來螢幕上睇係唔覺，呢樣要反省。」
思想傳統想有家
Jennifer在ViuTV新劇《地產仔》中，飾演霸氣Cat姐，但在孩子面前卻盡顯溫柔，但她略嫌自己未真正當過媽媽，欠了點甚麼，她說：「導演、朋友都話我仲爭少少唔似媽咪，我諗需要時間，𠵱家只能參考電影，做咗媽咪當然會好啲，不過最快都要等10個月。」
談到媽媽級演員，Jennifer以林嘉欣、李心潔為目標：「佢哋係好好演員，亦有自己的家庭，可以結婚生BB。我好傳統，作為女人想有自己家庭，可能做咗媽媽，演戲上更有體會，如果生咗小朋友，頭幾年會投放多啲時間陪小朋友，陪佢哋成長，唔想錯過小朋友每段時間。」口講不心急，但希望30歲前生小朋友，Jennifer說：「自己17歲時想20歲結婚，20歲想25歲，過咗25歲就想30歲，但又唔太心急，事業上幾忙，好多精神時間都花喺工作上，做戲做過好多次媽咪同結婚，都算係經歷。」
嘆另一半未出現
結婚要找理想對象，可是Jennifer心目中的另一半還未出現，她說：「希望所有嘢都好夾，佢要夠成熟，遇到問題知道點解決，可以提供意見畀我，心地善良、整齊、愛屋企人。」Jennifer指自己未必可以閃婚，覺得沒有計劃的事情不切實際。
一杯果汁當兩餐
在疫情之下，余香凝指演員並不易過，慶幸自己慳家兼有積蓄，她說：「除非8號風球或紅雨，否則我都搭公共交通工具。原本計劃置業，想要一個屬於自己嘅地方同家人住，但太多事情未能預測，呢一年大家都好難捱，儲錢係積穀防饑，唔知道將來會點，要捱幾耐？𠵱家早、午餐都係一杯果汁當減肥。」
Jennifer因為少了拍攝工作，最近與吳嘉熙（Cheronna）一齊創作新歌《天地分裂》，在MV中二人飾演南轅北轍的兩姊妹：「我哋會將心聲寫成歌，同佢唔係好熟，又唔係成日見，但大家都會講自己經歷，新歌內容就係講信任，同佢做戲好有火花，我哋冇質疑對方嘅想法，認為啱就去做。」今年Jennifer原有的音樂會亦延期，她不覺得可惜，反而可以多點時間練習及儲定新歌。
撰文：張明
攝影：陳俊強
服裝提供：Initial fashion
場地提供：The ONE L16 The AIR