提起商台903《在晴朗的一天出發》，令人最深刻嘅一定係潘小濤嘅笑聲。不過小濤嘅嘻哈大笑買少見少喇，事關佢已經以私人理由請辭，8月7號將會係最後一次開咪做《晴朗》，之後會以嘉賓身份主持部份雷霆881節目。
將以嘉賓身份客串881節目
903《晴朗》由林海峰、小濤同KY阮子健主持，三個主持老友鬼鬼，噚日開咪就搵小濤開刀，小濤話「《晴朗》冇咗我係一個損失」，林海峰笑返佢轉頭，「知唔知點解領事館要撤走，因為噚晚收到潘小濤唔做商台，佢就燒咗啲文件，見佢份合約冇用燒晒佢」。八方聽到笑到肚痛，不過小濤冇喺節目交代離職原因，預告last day先同大家交代。
坊間對小濤離職有唔少揣測，聯想會唔會同國安法有關。八方聽聞，商台2016年雖然獲政府續牌至2028年，不過就會喺2022年8月做中期檢討，而商台喺逆權運動期間收到好多投訴信，壓力唔細。商台回覆話，經多番挽留同商討，小濤8月開始會以嘉賓身份主持新節目《國際線》之《串》，以及《讀懂中國》，又感謝小濤15年來效力商台。而小濤日前接受眾新聞訪問，強調因個人理由辭職，同商台保持愉快關係之下離開，不過佢喺訪問都坦言「作為傳媒，未來一段時間環境是艱難的」。冇咗小濤嘅《晴朗》，好多聽眾都若有所失，唔慣冇咗小濤笑聲，八方就想同小濤講聲加油，不時上《晴朗》客串吓，喺黑暗時分帶畀香港人多啲笑聲。
李八方