在香港做家長真的是最辛苦的工作！如果貴子女是在本地學校讀書，那麼功課可能多到飛起，時時測驗，課後又要學小提琴、芭蕾舞、法文、德文、上興趣班，孩子常常唔夠瞓，家長十分苦惱。但若然讀國際學校，又怕中文底子唔好，又驚行為有問題，又驚太自由，家長們往往感覺到進退兩難，有苦自己知。
遇到孩子有行為問題，在夜闌人靜時，家長可能會大聲問自己：那真是我的孩子嗎？會唔會喺醫院出院嗰陣時接錯咗2號床個仔返屋企一路養大到今時今日呢？媽媽們請記住你們是優雅而善良的時代女性，爸爸們請記得你們是溫馴而又有愛心的男性，絕對不可以變成暴戾家長喔！就等大夫教你一個教仔嘅必勝絕技啦~陌生人眼鏡！
戴上陌生人眼鏡，你便不再是孩子的父母！你只是一位陌生人，你可以用一個全新的角度觀察並欣賞你的孩子，而你對孩子亦再不會有過份的期望！所有孩子的行為問題、你跟他的恩恩怨怨都會一掃而空！正所謂像粉筆字一樣被抹去。
戴上陌生人眼鏡，你變得心平氣和，善良的心和同理心就再不會被憤怒所掩蓋，你就能夠心平氣和地看着孩子標緻的面孔，他是多麼的天真活潑、勤勞、有自信、有自己的想法（即係有陣時唔一定聽你支笛）、好動（即係有陣時跳來跳去）、好靜（即係有陣時坐喺度發呆），種種行為問題立即都變成唔再係問題！戴上陌生人眼鏡，你對佢嘅要求亦都唔會再過份高，因為你只係一個陌生人，但係你對佢嘅欣賞程度同容忍力就大幅度提高！
嘗試每周用一個上午戴上陌生人眼鏡跟孩子相處吧，過一段時間，你會察覺到你倆關係可能已大幅改善，而且孩子之前所謂行為問題也可能煙消雲散呢。很多時候作為父母，出於關心愛護子女，我們往往會被情緒所牽動作出過分的要求及無理的責罵，嘗試戴上陌生人眼鏡，讓我們重新尋回我們真正的孩子吧！
林煒 精神科專科醫生
想輕輕鬆鬆健康啲，記住留意健康蘋台
http://health.appledaily.com.hk/