噚日係Google一打「你哋」，就會彈出「你哋真係咁憎我哋？」嗱！咁曳推爆搜尋器嘅香港人一定知，自稱正義之師嘅香港警察噚日播出「紀錄片」《暗夜星辰》，仲配埋英文字幕，五毛亦好齊心用英文留言，明顯係想將負面形象洗白。數字不會說謊，係YouTube條片負評有1.3萬，讚好數目一萬都未有，條片仲俾YouTube列為「社群認為下列內容不當或可能令部份觀眾反感」，講明「注意︰影片內容可能不適合闔家觀賞」，明顯係俾成千上萬網民report到YouTube要做嘢！喂三萬警隊去了哪兒？成班愛國愛港人士又去咗邊？
片中質疑抗爭者用「軍事化武器」
講返條片，繼續都係抹黑抗爭者，其中有位PoPo質疑抗爭者用「軍事化武器」，係啲咩？原來係「雷射槍」、「丫叉」同「魚槍」，不過畫面就唔見魚槍，只係見到劍擊用嘅佩劍。講到抗爭者暴力冇血性，PoPo就美言自己「無政治立場」，「見到有人犯法就拉」，好多網民睇完即時反問，咁7.21呢？話明係洗白當然無講，連一格警暴畫面都冇，過咗一年，冇反省警暴，反而扮無辜，話畀時間證明一切。怪唔得好多網民喺討論區開帖，問點答「你哋真係咁憎我哋？」幾乎所有人留言只答一個字，係。