本月10日病逝嘅英格蘭足球名宿積查爾頓，禮拜二喺英國約克郡舉行出殯儀式，大批民眾冒着武漢肺炎疫情，上街向呢位1966年世盃奪冠功臣作最後致敬。積查爾頓嘅送葬車隊，禮拜二朝早出發前往位於紐卡素嘅火葬場前，特別喺呢位列斯聯名將嘅出生地阿士頓進行巡遊，途經包括佢年幼時嘅住所一帶。車隊由載住積查爾頓靈柩嘅靈車帶頭，不過胞弟卜比查爾頓就以健康為由未有出席。
沿途有大批民眾拍手道別，亦有人喺住所外掛上寫有悼念字句嘅英格蘭旗幟。受到武漢肺炎疫情影響，積查爾頓嘅喪禮只能以私人儀式進行。晚年患有淋巴癌同埋認知障礙嘅「大積」，曾代表英格蘭上陣35次，包括喺66年世界盃全部6場賽事以正選姿態上陣，並同細佬卜比查爾頓齊齊成為當年三獅軍團捧盃功臣之一。