前輩笑藝人是樓市明燈，我說前輩亂噏就真。世上每瓣都有人優勝有人差劣，幾年前我就幫某位電視台男明星入貨，親睹他在投資上的表現，完全與其身高成反比。
那些年我好鍾意搞獨家代理盤，某天接到一個電話，想睇我件貨。睇樓當天我已提早15分鐘到場，一輛七人車停泊眼前，車門一開，嘩！身形果然名副其實。行入單位後，他望吓景，十幾分鐘粒聲唔出，當我提供該廈一年成交紀錄，他才開金口：「呢幢大廈有幾多放盤？」試問我點會話好多選擇呢，然後我答：「3個。」他就說：「睇完！」並跟助手離場。
翌日午飯，我跟朋友呻，我知他是名人，擺款乃人之常情，但都回個價呀，正當不滿他的時候，就收到他助手電話：「有興趣買！」但還價比業主開價低10%，然後我問完業主，換來減8%方案。當晚他助手致電回覆：「減8%，可以呀，但我哋用BVI公司買，佣金畀0.5%。」佣金比平時少一半，換言之，榨完業主榨經紀。鬼叫我窮呀，就咁開始幫他買貨。
兩個月後，他助手再打給我買埋之前放盤那兩個同廈單位。握過手，略為熟，從他助手得知，他早已睇中該廈樓下人流旺、近地鐵站，預備1,500萬元投資，亦計劃拆開3份，方便日後出貨。買賣用BVI不單止低調，還因為慳稅。不過，前後3單刁，單單佣金都0.5%囉！
小師兄
http://fb.com/siuching28