阿士東維拉禮拜二喺英超聯賽，憑住馬莫特查斯古特上半場一箭定江山，主場1:0贏咗阿仙奴，加上護級對手屈福特喺另一場吞咗曼城四隻光蛋，令維拉升咗上聯賽榜第17位，暫時逃離降班區域，亦令護級形勢突然大變。至於阿仙奴輸埋呢場之後，今季喺英超畀盡最叻都係排第八名，想下季有得踢歐霸盃，就要寄望贏到英格蘭足總盃冠軍。
屈福特吞4蛋跌落尾3
經過禮拜二兩場波之後，本來已經開始明朗嘅英超嘅護級形勢，突然多咗唔少變數，撇除早就篤定降班嘅諾域治之外，聯賽榜第17至19位嗰幾隊都要鬥到最後一周，先會知道邊兩隊冇得留低。雖然維拉贏阿仙奴之後，成功自今年二月以嚟首次逃離降班區域，但佢哋其實仲未上晒岸，因為隊波𠵱家只係以得失球差，壓住同樣有34分嘅屈福特，而以31分排尾2嘅般尼茅夫亦有機會逃出生天。
按照目前嘅形勢，今季先由英冠升番上英超嘅維拉只要喺煞科戰，同屈福特以一樣嘅比數贏波或者和波，就肯定可以成功護級，佢哋嘅領隊甸恩史密夫喺擊敗阿仙奴之後，亦講明覺得屈福特都贏到呢隊阿仙奴，所以佢哋下場一定要贏韋斯咸。
對於啱啱輸畀曼城嘅屈福特嚟講，護級條件就有啲複雜，如果維拉最後一輪贏波嘅話，佢哋就要比對方贏多兩球先得，但如果維拉輸波，佢哋就只要和波都已經夠分護級。至於情況最危急嘅般尼茅夫，自己要爭氣贏波之餘，仲要望維拉同屈福特齊齊輸波，形勢都幾被動。
槍手想踢歐霸要贏英足盃
根據賽例，如果各隊最終同分嘅話，會先計算得失球差，但維拉目前只係以-26球，僅僅好過另外2隊嘅-27球。如果都係分唔出高下，賽會就會根據佢哋嘅入球數字嚟決定名次，至今入咗40球嘅維拉，就明顯比屈福特（34球）同般尼茅夫（37球）有着數，但無論如何，佢哋幾隊點都要鬥到最後一輪，先可以知道邊隊有得留低。
另一樣可以肯定嘅，就係目前聯賽排名已經跌到落第10嘅阿仙奴，就算最後一場贏到屈福特，頂盡亦只可以升上第八名，係佢哋自從94/95年以嚟首次入唔到前6。如果佢哋仲想踢下季嘅歐霸盃，唯一希望就係喺8月1 號嘅英足盃決賽，擊敗車路士捧盃。