48歲的湯寶如前日在社交網貼出撐好友麥長青（麥包）新開張專門店的合照，老友撐場本來是好事，可惜湯寶如以一句「同你打包」回應網民，更跟網民兩度開火，將開張的喜事變成黃藍戰場，連累好友麥包新店無辜被染藍，她後來知衰刪post，麥包受訪時亦無奈地維護她。
繼湯寶如舊愛梁漢文早前因與譚詠麟及葵青警區指揮官謝振中合照鬧出風波，湯寶如前日也爆出「打包論」遭網民狙擊，麥包與湯寶如私交甚篤，所以老友麥包開店，湯寶如當然畀面撐場，卻連累麥包的新店被標籤成「藍店」！
「唔好意思令網民誤會」
事緣湯寶如於社交網貼出和好友麥長青（麥包）於新店的合照，其中一位網民留言：「以為賣包！」再配上興奮表情的emoji，似以「麥包」的名字說笑，豈料湯寶如竟回覆：「係呀！同你打包（意即將遺體放入屍袋）啊！」該名網民感錯愕：「我講錯嘢開罪你咩？」不少網民直斥湯寶如言談過火，另一網民解釋：「睇到麥包開舖，都以為係開麵包店！」
湯寶如自覺鬧錯人，旋即回覆：「沒有！沒有包賣的！」再配以笑到喊的emoji打圓場，但有網民直斥她：「嘩，人哋一句以為賣包，就話同人打包，惡到咁。」之後另一個post，有網民於她與麥包合照上留言：「兩個都藍，你一定支持啦。」湯寶如tag該名網民：「請問你係咪有病，不喜歡請你離開。這裏沒有顏色，請不要對號入座。原來你係黃㗎！黃即係咩意思啊？你想港獨啊，需唔需要我報警，我𠵱家好驚。」那位網民回覆：「我藍㗎。湯小姐不要誤會。」湯寶如再次自覺鬧錯人，便改口：「我喜歡好多顏色！」
經過一輪隔空罵戰，湯寶如前晚將原先facebook帖文刪走，而Ig則設定留言數量上限。湯寶如出post僅節錄部份網民留言，並寫道：「每個人也有自由言論，有些人挑釁和你不同思想的人。是甚麼道理！網絡欺凌是一件可悲的事，疫情已經越來越嚴重，仲要講政治！可悲！」惟至今仍有不少網民追問她刪post原因及政治取向。
因為一句「同你打包」引發軒然大波，將話題拉到政治「顏色」上，湯寶如昨日回覆《蘋果》時表示：「其實只係講吓笑，見到網民回應以為我鬧佢，即刻有答番話唔係，之後回應番嗰位網民嘅留言亦都俾人刪走咗，然後再無限放大。不過，令到嗰位網民有誤會，都要同佢講番唔好意思！」
麥包辯護率直沒惡意
麥包新店無辜被牽連，網民紛紛留言戥麥包慘「開張第一日就列入藍店，多得你唔少」，但亦有網友留言，指麥包當年欺騙無綫小生何寶生感情，令他後來傷心出家，更將這段「基情」寫到似層層。不過，麥包回應《蘋果》時就維護老友，雖然湯寶如與網民罵戰，以及網民貼出曹永廉支持他店舖將他染藍，但麥包說：「每一個嚟撐我都係好朋友，我好多謝佢哋！」
麥包又指湯寶如是率直、沒惡意︰「睇你點睇嗰句說話，『打包』我哋買外賣都係叫打包，佢自己本人已經解釋又道咗歉，其實佢鍾意講笑，我同佢認識係喺《SUNDAY新地帶》，係佢叫我『麥包』，後來佢叫到變咗『包皮』，好好玩，誤會啫。」
提到被翻陳年「基情」，麥包說：「把口喺人哋度，隻手喺人哋度，要寫乜要打乜，我都控制唔到。」問怕不怕被列入「藍店」？他說：「清者自清，我只係做生意啫！」