人稱「哪吒」嘅西貢區區議員方國珊舊年畀法庭下令向債主賠82萬，仲俾債主入稟申請破產。拖咗成年雙方傾掂數，哪吒終於肯找數兼俾埋訟費，於是債主噚日向高院申請撤回破產呈請。本來以為一天光晒，點知原來雙方仲爭拗緊訟費金額，哪吒喺庭外話債主開價7萬，根本係謀財喎！其實最緊要唔使破產、保得住議席啫，咪當破財消災囉，你知𠵱家好難搵工㗎嘛！
噚日哪吒喺庭上講明唔妥訟費計算方法，但聆案官都講明現階段唔會處理訟費爭議，勸哪吒搵法律意見，早日同債主私下傾掂數，仲善意提醒哪吒，如果法庭評定訟費嘅話，債主需要畀多筆律師費，到時佢最終要支付嘅訟費可能仲多，勸佢唔好「搵石頭揼自己隻腳」喎。
官提醒勿搵石頭揼自己腳
事緣債主關雄盛以已逝地主何淑明嘅遺產執行人身份，入稟指哪吒多年前同何合作建丁屋，但建屋進度未如合約規定，加上哪吒套丁犯法，遂要求收地兼索償，法庭舊年裁定哪吒敗訴兼要賠錢。哪吒噚日庭外同八方講，佢已經就案件提出上訴，仲等緊排期聆訊，但因為法庭「程序問題」，所以佢今年3月已經向債主找咗條數，連本帶利逾120萬元，好無奈咁話。
案件編號：HCB7283/2019
李八方