曾幾何時，報界有「印報紙好過印銀紙」既說法，不過報業經營艱難，加上疫情打擊，唔少老闆都呻難頂。最近八方聽聞星島集團有機會易手，有位潛在買家有意洽購何柱國手上股份，不過買家就唔想出面，交易風聲近來仲越吹越近，有傳相信《星島日報》多倫多業務喺月底就會完成出售，神秘買家屆時可以宣佈入主，但究竟「神秘買家」係邊個？八方打聽到，有傳係有「公海賭王」之稱嘅連超。
叠碼仔出身 背景神秘
連超又名連卓釗，今年五十歲嘅連超背景好神秘，根據網上公開資料，佢係叠碼仔出身，後來成為公海賭船「海王星號」投資人之一，搭通中、港、澳政經網絡，同連超相熟既「金牌莊家」詹培忠向八方講，「50幾歲，（經營賭業）年資唔算深，但紅褲子出身，相當穩陣，腳踏實地」，問佢連超會唔會進軍報業，詹培忠就不置可否，只係話傳媒在經濟利益上難以發圍，估計是社會影響力、政治力量因素，相信是深思熟慮行動，但未有具體內容不便評論。連超就透過發言人答八方，話「從來沒有直接、間接或透過第三者，向何柱國先生購入任何星島集團的股權，若有任何失實報道，將保留一切法律追究權利」。何柱國就答八方：「係咩？睇通告啦，你都儍嘅，冇啲咁嘅事，連超係邊個？」然後就收咗線。不過政商界耳語，何柱國與連超私底下非常老友，聲稱唔識連超簡直難以置信，估計連超唔會以真正買家身份買星島，而係透過關係財團收購，留有「窗口」打理星島事宜。李八方