病毒唔睇鐘，理鬼佢六點，全日都是武肺happy hour。的士佬、清潔阿姐、食肆阿哥、醫院文員、銀行揸「槍」量體溫的，都中招。連慶回歸筵開30席的翻版阿叻、白衫PK、大波石諸如此類的愛黨怪物，都難逃確診宿命。
市民抗疫疲勞，搶住做主持的那條同心底褲一再出鏡，攞景贈㷫，想叫她收皮都覺得攰。香港人心情低落，只好開窗，大叫「慶回歸確診群組」，叫三次，幫低潮的自己排洪，療癒效用不高但勝過搵CCTVB官方廣告介紹那個wetalk。talk乜先，光時，得唔得？唉，popo那支紫旗，令人面青，無法不想起一整年間那些被警棍打到發紫的手腳、一直「被無可疑」的浮屍那副紫脹的身體。新官狀病毒，是紫色的吧，變種後就是寄到禮賓府那隻手提包的橙色。
勞疫中最難聽的官腔是：未來幾天是關鍵！69、612、616、721已經一周年，關鍵在於，警黑警暴依舊，未來N天，国安出入維景有強制檢疫嗎？新聞說有港人無做檢測，偷渡回大陸，藍絲慶回歸群組以為除罩飲大兩杯睇錯，說好了的二次回歸呢？天后維景免費檢測兼送船票配合才好，對不對啊。