娛樂圈見高拜、見低踩是慣例，着數攞盡亦是圈中常情。出身公仔箱、人稱「神鵰俠女」嘅「鵰哥」同「鵰嫂」，喺電視圈中都叫紅過一段日子，之後棄視從商，喺內地搞生意。近年佢哋同好多過氣藝人一樣回流返港，鵰哥重投娛樂圈，雖然已年過半百，但勝在外表依然有型有款，加上埋到大老闆堆做波友，所以都有唔少戲拍。
含淚收貴重禮物
反觀鵰嫂已是師奶一名，不過佢亦都有生存之道，就係靠黐。話說佢兩公婆因為「高主席」關係，識到唔少賭廳廳主。其中一位廳主夫婦為人特別疏爽，鵰哥、鵰嫂自然mark到實，兩公婆亦都發揮擦鞋藝術嘅極致，令到廳主夫婦非常受落，跟出跟入、飲飲食食當然唔少得，最開心係年中收到唔少廳主夫婦送贈嘅禮物。
試過一次廳主夫人送咗個價值十幾萬嘅「狗袋」畀鵰嫂，收到件咁貴重嘅禮物，鵰嫂當然雙眼發光，但佢仍然記得交戲，雙眼含淚望住廳主夫人話咁大個女都未收過咁貴重嘅禮物，仲問人可唔可以認自己做契女。至於鵰哥都唔係省油嘅燈，身上唔少狗仔用品都係波友所送。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
