藍絲圈子近日瘋傳一段影片，條片入面兩個美國青年向路人派發口罩，路人唔領情之餘，仲兇返後生仔轉頭，話自己有唔戴罩嘅自由咁話。一向做開鍵盤戰士嘅梁振英就當執到寶，喺fb發文抽水，問香港人係咪要呢種自由？仲上綱上線，無端端提到國安法，話香港人冇不戴口罩嘅自由，正如沒有不維護國家安全嘅自由。講完一大輪，梁振英嘅意思原來係叫市民要「服從」，不過佢好快就俾網民用「回力鏢」反擊！
兩法例互相矛盾
有連登仔就搵到一張工聯會嘅網上圖片，梁振英曾經喺舊年立禁蒙面法嗰陣，喺工聯會節目度，大力支持訂立禁蒙面法，今日一拎出嚟，就變成今日的我打倒昨日的我，中晒自己嘅回力鏢。
八方向來支持法治，不過好多網民之後提出一個戴口罩嘅哲學同法律問題，就係到底戴口罩犯法定唔戴口罩犯法？須知道政府立戴罩法同時，梁振英舊年支持嘅禁蒙面法仍然生效，戴罩就有機會中禁蒙面法，最高罰款2.5萬蚊、監禁一年；唔戴罩，就中新訂立嘅戴罩法，罰款5,000蚊。咁究竟梁振英想市民罰款2.5萬、監禁一年，定只係罰5,000蚊呢？
不過，睇嚟梁振英嘅邏輯好簡單，就係政府叫你做乜，你就服從，否則香港就會越嚟越亂。至於兩條互相矛盾法例同時存在點算好？市民點樣跟？佢就梗唔理。八方覺得梁振英應該Tag返啲藍絲老友記，去少啲富臨飯敍、七一酒會群聚，似乎全港最「自由」嘅，係呢班夜夜笙歌、多姿多采嘅老友記。
李八方