麥德羅上周六確診武漢肺炎，確診前他曾出席飯局、音樂會及過百人壽宴等，當中包括他及其女友劉麗萍（Apple姐）在內的「富臨百人壽宴」群組，截至昨晚總共有8人感染，施匡翹及劉少君等也先後確診，麥德羅估計傳染逾11人。昨日有消息指麥德羅在確診前一日，身體抱恙下仍到深水埗一間中菜店跟老闆食飯，昨日他被求證時才坦認此事，被批隱瞞行蹤四處播毒。
現年61歲的麥德羅在上周六凌晨確診武漢肺炎，其女友劉麗萍及她旗下歌手施匡翹和宣傳人員阿佳亦相繼確診。麥德羅近兩周內，先於本月4日在尖沙嘴跟大批圈中人飯敍；10日舉行音樂會，現場約有40名歌迷；11日到屯門富臨酒家出席百人壽宴表演。「富臨百人壽宴」群組連麥德羅及Apple姐至昨晚有8人確診，出席麥德羅音樂會的劉少君、好友譚先生也確診，估計麥德羅傳染至少11人。昨日有傳麥德羅竟在確診前一日，即16日，即使身體不適仍到深水埗美食坊中菜皇跟老闆食飯，求證時他坦認有此事。
聲稱忘記行蹤
昨日WhatsApp群組瘋傳指麥德羅的感染源頭，來自早前有多宗確診者到過的新發茶餐廳，因不少人在此店見過他，並批評他在本月11日有病徵後，同日出席富臨百人壽宴，現該群組至少8人確診，此外更爆麥德羅在確診前一天，曾到深水埗美食坊中菜皇跟該店老闆吃飯。《蘋果》昨日致電麥德羅求證，他說：「我冇去過新發，啲人亂噏，其實我唔係要隱瞞去過乜地方，係入院時病到好嚴重，連呼吸都困難，點記得清楚去過乜地方，噚日都要用呼吸機，今日先好番少少，我確診前係去過屯門富臨、深水埗美食坊，亦去過張公館晚飯，又喺尖沙嘴做過歌迷會，但之前都唔知自己染到，知就即刻入院啦！」
麥德羅又表示：「我入院時情況係比其他朋友嚴重，我個仔都問契媽『爸爸今次會唔會死？』個衰仔咁樣咒個老竇，我一定會努力堅持落去。咁大個人係第一次入院住咁耐，我係習慣每日做運動嘅人，𠵱家日日瞓喺床，周身都唔舒服，我都希望自己可以快啲好番出院。」他預計兩周後才可出院。不過昨日較早時，麥德羅受訪時依然氣若游絲，聲音沙啞：「今日冇發冷發熱，冇發燒，但胸口痛，同埋個口腔……另外有啲咳。」
本月10日出席麥德羅音樂會的劉少君前日call白車入伊利沙伯醫院檢測，至前晚11時初步確診，他前晚向《蘋果》表示過去四個月一直入住尖沙嘴一間酒店：「四個月前我喺內地返嚟香港，要入住酒店隔離兩個星期，住落又覺得間酒店幾好住，所以一路住落去，邊間酒店就唔方便講啦。」劉少君表示過去兩星期只有接觸是麥德羅、Apple姐以及一位譚姓朋友，三人已先後確診。
劉少君少少咳
劉少君昨日再接受電話訪問，他透露已照肺、抽血及進行心電圖等檢查，他表示目前未有感到太大不適：「少少咳，醫生解釋得好詳細，話呢啲病毒入咗身體繁殖得好快。」他透露自己沒有發燒，亦沒有出現麥德羅的氣喘及血壓高等問題。問到會否比較放心？劉少君卻說：「都唔係，呢隻病治療方法有三種，一種食藥，一種打針，一種唔知乜嘢，我問咗醫生，醫生話我用打針比較好啲，大概兩個星期可以好番，正常人要打7支針，隔日打一支，我唔使，打5支得啦。」
Apple姐仍留院，她昨回覆時狀甚輕鬆說：「冇乜問題，今朝醫生打嚟話要再驗血同照肺，星期五再做多次深喉檢測。」仍留醫的施匡翹則在電話說：「我今日都係冇發燒，精神良好。深喉唾液今朝再畀多次佢哋，等佢哋覆番我結果。」
