侵侵簽署執行《香港自治法》，傳聞會有制裁金融業的措施，消息不絕於耳。究竟會唔會有金融制裁？係制裁啲乜嘢？制裁相關人士還是金融企業，分別會好大。
有報道話，最近各大外資金融機構紛紛「審查」自己對相關的人士或金融機構的exposure有幾多。金融操盤乜嘢都係講exposure。Exposure，一個咁重要嘅概念，好奇怪，中文卻無一個好貼切嘅直譯名詞。Anyway， 總之就係，如果有乜大鑊嘢發生在相關嘅人士和企業身上，個盤會有乜嘢後果，銀行和市場頂唔頂得住先？對金融業來說，應付人比較簡單，叫個客關戶口踢走佢就是了。落雨收傘永遠係金融業的the way of life，接受唔到，唔該唔好入行。
如果制裁嘅係企業就複雜好多喇。你估外資機構audit exposure淨係畀自己睇咩？佢哋係要畀「大佬」睇吓the latest overall exposure，如果郁手時將會係點。事實上真係有N樣要考慮，但好簡單，就搵一個簡單例子嚟解釋吓。
當美國真係話要制裁一間機構時，除了在政治上話唔准同呢啲企業有業務往來之外，最重要嘅一環，就係所有和這間金融機構的直屬相關股票、債券或其他securities嘅lending values會即刻變晒做零。即係話，之前銀行話嗰件貨可以按X成畀你，𠵱家唔好意思，無得再按，一係沽咗件貨還錢，一係自己搬錢入嚟還錢Ok？
決定會唔會制裁一間機構，其中一樣最重要就係要睇吓，呢間嘢在自己的銀行本簿和市場嘅持貨量高唔高。一般流通量越高，持貨量也就是lending values越高，潛在exposure就越大。金融操盤，揸住件「正貨」然後借上借係好普通嘅事，如果一個唔覺意把件「正貨」制裁，個exposure咁大就巳經唔單只係香港自己嘅risk，而係好可能變成世界金融市場嘅系統性風險systemic risk。美國會唔會背上這個污名？
相反地，如果有邊間機構嘅持貨好歸邊，佢直屬securities 嘅range又窄，就算郁你都係死「一小撮人」，咁美國佬就有可能會考慮，明未？
遮打道口水佬
本欄逢周三刊出