食環署吉祥物「清潔龍阿德」前日喺佢fb page出咗個po，張圖係泳裝女郎Aedes albopictus「伊伊」、即係白紋伊蚊嘅學名，原本想介紹食環署登革熱嘅網站，但貼文「要約直接見面嗎？」、「輕輕咬你耳朵」、「快看我的調皮視頻」等，再加上有靚女，自然引起網民熱議，但呢個po噚日突然被消失，好多網民立即覺得係俾政府自己河蟹咗。
水着model籲預防蚊患
不過清潔龍阿德出po澄清，唔係佢del po，佢話噚日出咗去做街市深層清潔之後，「返嚟一碌手機就見到facebook ban咗我個post」，佢唔知係咪有人report佢，更強調張相只係為咗出呢po，喺上網買嘅一張模特兒相，而且模特兒係着住泳衣，冇理由會俾人report「裸露及色情」，仲大呼冤枉，佢都係想提大家要預防蚊患啫！
之後清潔龍阿德再出一個po，話為免令大家誤會或不安，以後佢出po用乜嘢相，都會用「清潔龍AR德」IG filter，將張相嘅頭變晒做清潔龍阿德！