一直話自己係正義之師嘅香港警察，聽晚有個破天荒搞作，將會喺自己fb同YouTube專頁，首播佢哋同鳳凰衞視聯合製作嘅一套紀錄片《暗夜星辰》，咁內容講乜？咪就係反修例事件入面嘅警隊人物故事囉，由上年8.31晚金鐘暴亂到聖誕平安夜，呢四個月入面警隊多個唔同崗位人物喺反修例衝突中艱辛工作同心路歷程，仲形容拍攝紀錄咗上年香港暴亂中最危險、最混亂，同時亦係社會最撕裂時刻喎。
恐影響反送中案件公平性
執法部門拍片有先例，好似廉政公署，但人哋係拎啲已經結案個案，反送中運動仲有大量相關檢控仍未完結，警方想做大外宣，咁有冇影響案件審訊嘅公平先？甚至有冇可能有警務人員因為咁唔覺意涉嫌妨礙司法公正呀？
不過香港警察就一於少理，呢幾日喺自己fb落力推銷，話拍攝團隊喺籌劃同拍攝過程，克服各種難以想像嘅挑戰，影片仲提供大量真實珍貴紀錄，賦予紀錄片不可替代嘅歷史價值。
八方睇過條預告片，最後就有把獨白問：「你哋真係咁憎我哋？」仲話時間可以證明。真實珍貴紀錄係，香港人畀咗超過一年時間警隊，亦有多次民調反映大家對警隊睇法，似乎條紀錄片就冇紀錄啦。話時話，記者採訪時面對警暴次數多不勝數，警方成日話傳媒影響佢哋做嘢就將記者趕走，但原來又可以安排私家攝製隊跟拍，其實搵得紅色背景傳媒幫手，究竟有幾客觀同真實，相信市民自己心中有數喇！
李八方