【7.21周年】
7.21元朗恐襲事件今一周年，當日遇襲者留下不可磨滅傷口，後患更纏繞一生。65歲林婆婆在元朗西鐵站躲避白衣人追打時跌倒，導致關節發炎，右膝要削骨換上人工關節，留下五吋長疤痕。昔日她在體育館教授師奶跳舞，今日出入依靠輪椅，只能短暫步行。她對大批白衣人仍然逍遙法外感氣憤，「一年啦，佢告咗邊個呀？邊個入咗罪？咁大班人」。
記者：潘柏林
在7.21前，林婆婆非常活躍好動，參加遊行可走畢全程，閒時又會跳舞，「我不嬲都可以180度，腳踭（彎曲）去到屁股」。7.21當日，她參加完民陣遊行後，晚上搭西鐵回家，列車在元朗站開門時，有年輕人跑入車廂求助，「佢衝入嚟，佢話下面打緊人」。她與部份乘客離開車廂了解情況，結果在樓梯遭遇白衣人襲擊。
右膝切骨 留五吋長疤痕
事發近一年，當晚情況仍歷歷在目，「一仆一碌咁跑囉，跟住你知啦，有啲人梗係快、有啲梗係慢。亂晒龍，好似人踩人咁推嚟推去。好得人驚，好恐怖」。混亂中林婆婆在樓梯間跌倒，事後醫生診斷她右膝受傷發炎，去年11月21日安排做手術，切除受損骨頭和軟骨，再安裝全膝人工關節。
手術後，林婆婆出入靠電動輪椅。她說，經過大半年物理治療，右腿仍然腫脹，只能短暫行走，「你哋行十分鐘嘅路，我起碼行20分鐘」。她除下右膝的壓力繃帶，讓記者看手術留下五吋長的疤痕，「唉，好核突呀。咁囉，好核突呀」。
身體受傷不及心靈受創，7.21事件後，林婆婆一度失魂落魄，「我直情兩、三個禮拜冇瞓過，日日坐係度喊，都唔係我嚟。以前阿媽鬧我係一個癲馬、儍大姐。我又唔食嘢，坐係度係咁喊」。她其後向家庭醫生求診，證實患上創傷性後遺症（PTSD），要接受心理輔導和服藥。
這一年間林婆婆身心受折磨，瘦了十多磅，但她堅持追究事件責任，見過港職代表、出席三次記者會。有媒體記者邀約她重返元朗站受訪，她亦咬牙答應，「其實嗰晚之後，我係一次都唔想去（元朗站）」。每次出席記者會前，林婆婆都會大哭一場，連醫生都問她，為甚麼還要出來。
「一年啦 佢告咗邊個呀」
她說當然會恐懼，但憤怒情緒更甚，沒辦法說服自己沉默，「好似六四咁樣，你唔好講唔好提，一年一年、一月一月咁樣過，就係咁不了了之。我自己都60幾歲啦，我仲有冇機會再出嚟講呢？我自己都唔知」。她心中有氣，「就係簡單一句，我搭車返屋企，我做（錯）咗乜嘢？」
因公開追討，身邊街坊、診所護士認得她，有人勸她不要太高調，她倔強稱：「我話打囉，你殺咗我都唔怕，都咁老。」有人悄悄告訴她，某街坊的丈夫在7.21有份打人，已潛逃潮州，對於大批白衣人逍遙法外，林婆婆無奈又氣憤：「一年啦，佢告咗邊個呀？邊個入咗罪？咁大班人。」
港府至今拒成立獨立調查委員會，而網上越來越多各種版本的7.21事件，包括黑衣人「先挑釁」、林卓廷帶隊「搞事」等等。林婆婆說，對黑白顛倒感荒謬，「我覺得佢哋係好似用漂白水慢慢漂囉」。她覺得自己甚麼都做不到，只可堅持複述當日發生的事，「好似你唔講、佢唔問、你唔提，係咪無發生過呀？」