周日英足盃四強，一向喺呢個盃賽唔出場嘅曼聯門將迪基亞出乎意料打正選，點知又犯致命錯誤，累紅魔1:3不敵車路士出局。迪基亞近年續肥約但表現反而冇早年咁神勇，咁搞法隨時變做「山神二號」，成為另一個喺曼聯坐擁超高薪但冇表現嘅球星。
累紅魔出局車仔入決賽
紅魔喺今季英足盃一直由阿根廷門將羅美路踢正選，領隊蘇斯克查今場突改用迪基亞，點知就鑄成大錯。佢上半場完場前無法擋出車仔前鋒基奧特嘅射門，曼聯半場落後0:1。下半場一開波，車仔中場美臣蒙特一次睇嚟唔係好大威脅嘅遠射，迪基亞又救唔到。加上隊長哈利馬古尼「擺烏龍」，最後由波基斯費南迪斯破蛋嘅曼聯，結果以1:3被車仔淘汰，連續19場不敗走勢終於結束。
其實迪基亞失大意波，今季都唔係咩新聞，有統計指，佢近2季起碼犯咗7次嚴重失誤。今次佢又犯下大錯，當然馬上又會傳出將佢送走嘅傳聞。有人話倒不如由羅美路坐正好過，家陣任球評家嘅英格蘭名將舒利亞就話，下季曼聯可以試吓由今季喺錫菲聯有好表現嘅借將甸恩軒達臣把守最後一關。其他名宿好似「菲臘佬」菲臘尼維利同塞頓，賽後都將矛頭指向迪基亞，話佢冇晒信心，同以前屢救險球根本判若兩人。
名宿齊炮轟應召回軒達臣
連前曼聯主帥摩連奴都加入戰團，話歐洲各大球會家陣都有好門將把守最後一關，紅魔要賣走季初先同佢續約至2023年嘅迪基亞真係唔易，最重要係佢周薪成37.5萬鎊，根本冇人願意接貨。分析仲指，如果曼聯一意孤行要送走佢，分分鐘要好似將阿歷斯山齊士借去意甲國際米蘭咁，要補貼佢人工先至可成事。
講真，曼聯近年喺轉會市場買人同埋同球員續約都幾進退失據。山神喺奧脫福攞到份肥約後表現判若兩人，最後搞到要好似送瘟神咁送佢走。保羅普巴究竟續唔續約，同樣講到厭。到「山神二號」迪基亞續約後就失誤頻頻，由「神龍」變成「神經刀」，難怪摩連奴都話，究竟邊個決定同意以咁高人工同佢續約？
曼聯因迪基亞犯錯而喺英足盃出局，車路士晉級後將會喺8月1日同阿仙奴上演倫敦打吡決賽。足智彩就睇高車仔一線，冠軍賠率得1.57倍，至於近2場連贏利物浦同曼城嘅阿仙奴就有2.25倍。
