人稱「朱翁」的朱維德今年已達89歲高齡，是無綫開台首10位員工之一，地位超然，惜近年無綫不斷縮皮，老牌員工不受重視。去年12月，朱翁最後一個主持節目《文化廣場》停播，他今個月約滿決定離巢。朱翁日前接受《蘋果》訪問表示：「佢哋話有節目畀我，但投閒置散我唔願意。」
撰文：嵐山
攝影：沈健程
朱維德今年89歲，比胡楓還要大1歲，他自1967年加入無綫擔任新聞主播，是開台首10位員工之一，地位超然，惜近年無綫不斷縮皮減騷減薪，老牌員工或已成負累，劉江、雪妮等相繼離巢。去年12月，朱翁最後一個主持節目《文化廣場》停播，當時的朱翁老馬有火，怒斥：「TVB越來越衰！」事隔逾半年，朱翁今個月正式約滿離巢，無約一身輕的朱翁日前在青龍頭接受訪問，輕描淡寫談去向：「佢哋話有節目畀我，但投閒置散我唔願意。」朱翁直言ViuTV曾洽談合作，但疫情嚴峻，笑言年紀不輕，不敢「搵命博」。
遊監獄入娛圈
朱翁在1950年來港做教師，但為人好動，幾乎遊遍整個香港，「有句說話，嫁雞隨雞，嫁狗隨狗，嫁着朱翁就隨山走。我以前每逢周日都會去一次旅行，幾大雨都唔會停，行晒整個香港（山頭）起碼5年時間。」有次途經赤柱，朱翁被一所建築物吸引，「嗰度就係赤柱監獄，我為咗入去睇吓，膽粗粗自薦入去演講，講幾次就行勻晒成個監獄，仲要求畀我坐（監倉）咗15分鐘，除咗一個地方未踏足過——水飯房。」
想不到在監獄演講，讓朱翁認識當時在懲教署擔任教育官的鮑漢琳，成為他加入娛樂圈的契機，「佢嗰時已經係麗的好出名嘅演員，話想做個節目叫《香港典故》，節目出街前五日都未搵到人，咁我乜料都齊，梗係冇問題。」之後朱翁被無綫挖角，跟邵逸夫、利孝和等一齊打江山，提起往事滔滔不絕：「係呀，我最老喇，由TVB最早有人嘅時候做起，喺利孝和嘅辦公室，歌和老街唔記得幾多號，4層樓嘅樓，最低層係新聞部。我做乜？就係讀新聞畀人聽，速度應該幾快先適合，160個字一分鐘就係咁嚟。當時只得10個人，仲未有五台山，之後廣播道出現，TVB就正式開幕。」
坦言不懂演戲
當了五年新聞主播，朱翁其實還有好多搞作，「成班攝影師得閒，我就帶佢哋去影大澳日落、南丫島，佢哋覺得得意，剪輯成片段。當時廣告唔夠，要用一啲片填滿，就用咗朱維德拍嗰啲。後來又覺得朱維德辦的旅行社也可以，朱翁旅行團就咁嚟。」之後朱翁還獻計在《歡樂今宵》做一些有思考性的趣劇《上下古今》，《大江南北》亦是他得意之作，但談到拍劇，他卻印象模糊，坦言自己不懂演戲，演出的角色只是做自己。