香港再次爆發武漢肺炎，日前左報即時將成件事賴落去民主派搞初選，同埋7.1有市民自發「行街」引發，但話口未完就爆出愛國愛港慶回歸晚宴變感染群組，幾十人又唱歌又跳舞又唔戴口罩，搞到建制陣營立即縮埋唔敢再提。點知官媒新華社仲拎出嚟講，又屈7.1同初選係導致疫情持續擴散原因，好多網民睇到笑到收唔到聲，話新華社係咪想曲線提醒人，導致疫情擴散其實係建制派有份？
翻炒左報成笑柄
新華社噚日發表一篇文，聲稱「香港各界」認為係「反對派」堅持「非法遊行和所謂『初選』等聚集活動」，導致疫情持續擴散蔓延，罪責難逃，仲引用眼科醫生周伯展話，7.1遊行同立會初選與疫情爆發時間脗合，不排除兩者有關。
有網民即時拎篇文笑，話明顯抄早兩日嘅左報報道，但事實係愛國愛港慶回歸晚宴爆群組感染已有官方證明，連建制陣營唔想再提，以免再俾人翻舊賬，話愛國愛港人士有份令疫情擴散，新華社又再拎出嚟翻炒，叫班建制派點避好呢？