【7.21周年】
一年過去，7.21襲擊的陰霾在元朗居民生活中依舊揮之不去，當晚數百白衣兇徒絕大部份仍逍遙法外。暴力植根元朗，黃店東主、區議員甚至路過連儂牆的街坊亦遇襲，經傳媒報道的已有逾10宗，幾乎每隔一個月就有支持社會運動的元朗人被攻擊，但絕大部份案件都無人被捕。記者訪問了兩名受害人，他們不約而同認為，警察的不作為，才是暴力滋生的癥結所在。
記者：關冠麒
自小在元朗長大的豪Dee是其中一名受害者。自去年7月初起，豪Dee就自發在區內貼文宣，搞連儂牆，又幾乎每日在西鐵站地下搞一人街站，高大又聲如洪鐘，吸引途人駐足，街坊稱他「大聲哥哥」。7.21恐襲後，家人擔心豪Dee，勸他在區外暫住避風頭，但他還是留低，繼續做大聲哥哥。
藍絲持鏟刀指頸 警即場放生
一星期後，30萬港人走在元朗大馬路，展現勇氣。但暴力恐嚇在區內未有減退，「連儂牆手足」更是首當其衝，經歷過無數次被藍絲、鄉黑騷擾，「（7.21後）係猖獗咗，明目張膽攞正牌嘅感覺，好似背後有人撐腰，就聲大夾惡」，豪Dee更不止一次受到生命威脅。
去年10月，豪Dee和街坊一起整理連儂牆，突然數十人拿着國旗、鏟刀，由西鐵站走到地面，鏟走文宣。「你咪鏟囉，我再貼」，殊不知藍絲們竟用鏟刀指向他，「甚至好近咁指住我隔籬個女街坊條頸」。報警後警察到場，將兩批人分開，似曾相識的畫面再度出現，「（警察）將拎住攻擊性武器嘅藍絲擺喺身後面，盾牌就對住我哋啲市民」。豪Dee將襲擊片段給警員查看，警員卻回應道：「人哋攞鏟刀嚟鏟嘢咋嘛，即係冇問題啦？」
今年1月30日，西鐵站再發生駭人聽聞的圍毆事件，數名男女在連儂牆前被十多人襲擊，部份人持伸縮棍，傷者頭破血流。過程被路人放上網，傳媒稱之為「小7.21」。豪Dee正是傷者之一，縫了13針。有議員見到兇徒往南邊圍逃去，到場警員卻在牆外止步。半年過去，豪Dee鼻上仍有疤痕，但警方調查卻毫無進展，「有冇認人呢？完全冇，乜都冇，連打返電話嚟都冇……完全不能信服（警察）係想拉人囉」。
雖然親身經歷暴力襲擊，但比起元朗的土豪劣紳，豪Dee更痛恨香港警察，「警察進化到擘眼大講大話，有埋片都覺得冇問題……元朗人對警察冇期望，亦好厭惡」。
在大馬路旁的又新街，留着花白長髮的生果檔檔主華叔指着師奶說：「唔好落手（揀）呀！呢排洗手都洗到爛啦，點知你有冇病？」華叔的「寸」，由八年前豎起一面「本水果檔不售賣給內地人」紙牌開始街知巷聞。今年又被拍到在檔口怒罵防暴警毆打被捕少女，成為當區知名黃店。
黃店東主：反送中後無人行咇
在元朗做黃店，少不免有風險。今年2月一個晚上，華叔檔口被數名黑衣人搗亂，水果散滿一地，損失逾7,000元。「我哋有六個鏡頭影住㗎，影到晒！」但華叔指，警方到場後不僅不願意影相記錄狀況，更沒取走錄影帶調查。有消息指，黑衣人來自南邊圍，據華叔了解，事件未必與政治立場有關，但他對警察「闊佬懶理」的態度極之氣憤，「佢話我係『黃』畀人掃檔，好似應該咁」。
華叔覺得，元朗地區勢力在7.21後並沒有變得越來越惡，「講惡我惡過佢哋啦！」他認為區內治安問題癥結還是在於警察。他眼見自反送中運動開始，元朗就不再有警察行咇，搶劫、爬手多到不堪，「唔係人手（問題），係藉口。淨係理啲人有冇去抗議，忽略晒市民所得嘅保障……唔係維持香港治安，係維持香港共產黨嘅政權」。
八十年代起搬到元朗、屯門生活的華叔自問本非善男信女，算得上「惡霸」，十多年前才收心養性擺街邊檔維生，元朗的所謂「鄉黑」對他而言，根本不入流。近十年轉賣高級生果，他深知元朗的真正主流並非土豪，「好多中產搬入嚟，有知識又搵到錢，外來人多。你睇啲師奶，個個心都好『黃』」。即使受襲，華叔那塊紙牌會繼續插在生果之中。
至於豪Dee，雖然經歷多次襲擊，又在區內兩度被捕，整個警區的警察都認得他，「第一次被捕，啲警察喺值日官面前話，『我哋請咗個貴賓返嚟』，好似好威咁」，但他仍日復日繼續大聲宣傳抗爭。他說恐懼必然存在，但7.21除滋生暴力，亦令區內產生守望相助意識，「街坊見到我會主動問需唔需要幫手，有啲就話『留低一陣幫你睇住側邊』，又有姨姨成日切生果落嚟畀我食……個心係有啲驚，但係又有啲安心」。
「我好想講畀全香港人知，班鄉黑唔代表我哋，佢哋只不過係組成元朗嘅一個極少部份；區選，元朗33席民主派區議員；喺元朗每行幾步就有一間黃店，好似七仔咁；連儂牆又有班人好用心咁帶啲資訊畀其他街坊……其實元朗人好黃，黃到你唔會想像到。我係好proud of 自己做一個元朗人，有好強嘅bonding，好有愛。」
