已婚嘅摩連奴上周日帶領熱刺喺英超北倫敦打吡戰，以2:1贏阿仙奴後，又俾人揭發佢同紅顏知己Prue Carter-Robinson密會，地點更加係呢位43歲金髮美女嘅香閏，令佢哋之間嘅婚外情傳聞，再次傳到㷫烚烚。英國《太陽報》話，雖然摩佬當日戴晒口罩同太陽眼鏡（小圖），但途人一眼就認得出佢。更耐人尋味嘅係，佢竟然帶住一件阿仙奴波衫去見Prue。
其實早喺2018年，英國傳媒就已爆出摩佬同本身有個仔嘅失婚婦人Prue過從甚密，據講大約10年前教皇家馬德里嗰陣，就已經邂逅咗曾經喺IBM做嘢嘅Prue，佢舊年三月仲俾人撞到喺卡塔爾一間豪華酒店一齊曬太陽，睇嚟佢哋嘅關係真係一啲都唔簡單。其實今年57歲嘅摩連奴，17歲就識咗比佢細2年嘅太太Matilde Faria，佢哋結咗婚31年，仲有一對仔女，佢哋係佢生命入面最緊要嘅事情。雖然喺球場外經常以好男人形象示人，但摩佬喺球場上不嬲都有「寸王」之稱，不時都有惹火言論。由熱刺同Amazon串流平台合作拍輯嘅紀錄片《All or Nothing》下月就會啟播，早兩日有部份片段流出，睇到摩連奴同班球員講，喺場上唔可以咁好人，仲要做一個為咗勝利乜都肯制嘅的婊子，盡顯佢嘅狂人本色。