武漢肺炎在港爆發第三波，一班藍絲到旺角雅蘭中心稻香舉辦「慶回歸」聚會，先後已出現4名確診者。雅蘭中心有多個樓層的食肆，賭王三房千金何超蓮在同一個商場的二樓開了她代理的台灣牛肉麵店，《蘋果》前晚到過該商場，見商場人流近乎零，由於政府「加辣」，於上周三實施下午6時後禁堂食，只可外賣的新措施下，見超蓮的麵店只有店員及廚房人員呆坐，未有客人幫襯外賣，到昨午更公佈措施延長多一個星期。
晚市曾食蛋
記者昨日聯絡超蓮，她表示睇到新聞知道商場有其他食肆公佈有確診者：「佢哋喺4樓，我哋麵舖喺2樓，我哋不嬲都有消毒清潔，會為客人量體溫同提供酒精搓手液，所以我哋唔太擔心，衞生情況係OK。」問到近月生意有否因疫情大受影響，超蓮就大嘆經營環境險峻：「老實講，我哋已經捱咗幾個月，禮拜三開始政府又開始禁6點堂食，更加難搞，我諗同其他食肆一樣，都係雪上加霜，加上我哋賣嘅係湯麵，外賣不嬲都唔係我哋主要收入，同埋疫情確診人數上升返，商場係少咗好多人流。」
再問超蓮的生意額跌幅多少，她說：「呢兩個月實質數字要問返股東，我之前個幾月忙阿爸喪事，間舖運作係股東幫手頂住，個疫情由1月開始，我哋生意都係好受影響，有時真係得千幾蚊一日，𠵱家確診人數又多返，可以同你講，我哋禁堂食之後係試過晚市係食蛋，生意係唔夠交租。」
冇炒過員工
至於銅鑼灣店是否一樣捱緊，超蓮說：「銅鑼灣店生意當然都有受影響，但業主好好，有主動減租，大家共度時艱，同埋呢間我哋有賣包裝麵，可以幫補到少少生意，旺角嗰間我哋呢幾個月不斷有同大業主傾過，佢哋有兩個月減咗少少租，不過我哋剛剛又收到通知，9月會加我哋租，其實唔止呢個月我哋係蝕緊錢，呢半年因為疫情關係，我哋係蝕咗200萬，我哋真係捱住同守住，冇炒過員工，香港飲食業大部份食肆𠵱家生意少咗，要守住真係要業主可以幫幫手，我同啲股東都不斷開會研究仲有乜可能性，都係畀心機盡做。」超蓮於2018年將台灣牛肉麵引入香港，先在銅鑼灣開舖，她的不少明星朋友都有來幫襯成為人氣食店，旺角雅蘭中心則是今年開的新舖，1月中試業，2月正式營業，卻遇上疫潮經營變得困難。