元朗7.21白衣鄉黑恐襲市民事件，唔經唔覺已一周年，至今仲有大量真暴徒逍遙法外，雖然建制派同Popo全力洗白甚至想改寫歷史，好彩仲有個別傳媒好似港台咁堅持搵真相，最近一集《鏗鏘集》，港台透過重組多段當日影片、車牌查冊同白衣人衣着，令Popo終於肯認當日一早派咗便衣警觀察白衣人，同時透過訪問，令一直被公眾認為涉事嘅「戰狼」何君堯，盡情展露「誠實」一面！八方收到料原來何君堯嘅訪問仲有「外傳」，最近仲放咗上網，完全揭露佢嘅真面目。
「當自己警務處長？」
話說「戰狼」當日同過班白衣暴徒握手，佢喺《鏗鏘集》出街部份話7.21真正原委係「顏色革命、外國勢力」，對於自己叫過鄉民打到人片甲不留，佢反問「咁又點？任何吹水都唔得？」仲話係人都有情緒，「我同你（記者）傾偈都有情緒！」
之後網上流出「幕後花絮」片段，「戰狼」真係好有情緒，大聲訓斥記者：「做編導，做訪問，一定要做功課；你使乜問我誠唔誠實啫？你唔使喺度跣我，你問我何君堯誠唔誠實？多餘啦！」再三強調自己「係個好誠實嘅人」，又質疑記者冇資格挑戰佢係咪誠實：「你當自己係邊個？警務處長呀？」再鬧爆記者「咁樣做節目，我梗係憤怒啦」，然後叫記者「返去檢討吓自己」。「戰狼」咁樣展示「誠實」一面，相信大家同八方一樣，對佢同7.21嘅關係，係咪解開咗啲心底疑問呢？
李八方