日子有功，和泉素行（Soko）來港發展十多年，加上在日本讀大學時已經副修中國語文，讀寫聽廣東話，難不了Soko。由YouTube界崛起，近年再進軍電視主持行列，他那件「國際巨星」tee真的如有神助。
訪問自備小道具，Soko用心良苦，「魚蛋太郎」吉祥物和「國際巨星」戰衣，缺一不可。Soko說：「呢件新設計嘅，係2.0！」有Soko本尊大樣加持。
「可能我唔係國際巨星嘅料，所以不如我就自己稱自己做國際巨星啦！其實真正嘅國際巨星，唔使着國際巨星嘅T恤嚟話畀人聽，我係國際巨星！不過𠵱家呢，好多人叫我國際巨星喇！」
Soko自嘲又認真：「我都有個message想話畀大家聽，你細個夢想係乜嘢呢？你如果想做，立即𠵱家可以做到！」做咗先講，難保夢想他朝成真！星爺對白話齋：「做人冇夢想，同條鹹魚有乜嘢分別？」不過Soko最愛港產片，卻是王家衛和陳果的電影世界。
國際巨星不是夢。至少講吓，都開心！
撰文：文嘉龍
攝影：郭賢興
人生在世有得必有失
最近Soko為香港開電視拍的《酒勻全香港》，與小儀做拍檔最合拍，兩個由電台做到電視；相反去年和蘇施黃主持ViuTV的《厲害了！蘇哥兒》，就令Soko很大壓力。
「已經有少少超過咗良性嘅壓力，即係有少少恐怖嘅壓力，不過佢（蘇施黃）非常之專業嘅，我如果叠聲，佢話唔得，跟住我有誇張嘅反應，佢又唔得，呢個係我表現方式，我都有嘗試同佢溝通，不過都話唔得，佢真係好恐怖嘅！不過當中可以學到好多嘢，佢講所有嘢幾乎言之有物，我就有時講啲廢話，例如對住刺身話『好新鮮喎』，刺身本身係新鮮嘛，跟住蘇施黃就話『喂，你唔好講呢啲啦，再嚟過！』真係好大壓力！」說時表情十足的Soko，將蘇施黃的霸氣活靈活現出來。主持人身份，Soko當然是蘇施黃後輩，但在YouTube界，蘇施黃是後來者，「我睇演唱會時候撞到佢，佢走埋嚟我度，箍我頸，『你個死仔』哈哈！佢係好friendly嘅！佢開YouTube channel，我都有follow佢㗎！」
現在疫情下難得開新節目，不過之前的幾個月，Soko幾乎完全停工，國際巨星都冇計！「差唔多兩、三個月嘅收入減咗一半，我知道有人情況比我更加差。當大家都唔好嘅時候，一齊共同度過啦！2、3月最冇工作，其實『人生在世，有得必有失』，我好鍾意呢句。你失嘅同時，有啲嘢係你自己得緊，可能係時間同埋身邊嘅人。雖然我同日本屋企人見唔到，但係身邊香港嘅朋友，一齊做創作嘅時間反而多咗！」
早前沒有工開的日子，Soko重拾結他，「我重新攞起咗我支結他喺屋企練，多咗好多思考同創作時間，可能我都係向唔好嘅方向諗得多，但係其實可以轉一轉方向。雖然好艱難嘅時候，你嘅思考可以向好嘅方向諗，可以嘗試做吓之前你冇做過嘅嘢，面對自己，對你人生有更大幫助！」
我都enjoy幾窮嘅生活
愛唱Beyond的《海闊天空》，Soko都是一生不羈愛自由。愛自由更愛香港，他由2006年來港發展至今，依然難忘第一次與香港的接觸，「第一次接觸香港，我喺廣州暨南大學做交流生嗰陣，因為香港同廣州比較近，我想落嚟香港睇吓，我覺得香港好好玩！第一次嚟香港係shopping，因為廣州嘅東西，我覺得唔係好型呀！有時weekend我專登落嚟香港買嘢，我一落嚟香港，望到好多顏色嘅霓虹燈招牌，喺街見到好多唔同國籍嘅人，來來往往，嗰種氣氛令到我感到好自由。香港好welcome接受唔同國籍嘅人，好welcome我嘅存在，我就感到好抒懷。」
來香港發展前，Soko曾經到台灣簽約模特兒公司，當時同期出道的還有吳尊，這段日子是Soko的失意階段，零工作等運到，「係我感到最唔開心或者最辛苦嘅一個經驗，因為我簽咗一間娛樂公司agency（伊林模特兒經紀公司），除咗我之外，仲有飛輪海嘅吳尊，同埋一個日本模特兒，三個新人同一期簽。三個當中我係最冇工作，幾個月之後，manager同我講『Soko，其實台灣市場，吳尊咁嘅形象係會紅，你嘅感覺比較另類啲，我哋公司唔會捧你，不過你想留低可以keep住留低。』」
此地不留人，自有留人處。Soko找朋友搭路香港的模特兒公司，自薦成功正式來港發展，但早期的模特兒工作有限，Soko要到酒吧兼職侍應一腳踢。他說：「我打工收入仲多過我做model收入，同埋我都有教日文。我同自己講，去到30歲都係冇乜機會嘅話，我就會唔做呢一行，29歲真係放棄過，去搵其他工。」2010年，Soko與兩位日本朋友組成樂隊J.A.C（Japan And China）參加亞視的《亞洲星光大道3》。「可能因為我哋係日本人啦，就算唱歌麻麻哋，我哋可能特別啲幫到收視，我唔知道乜嘢原因，真係冇諗過我哋可以去到決賽。」
來港初期的六、七年間，Soko在銅鑼灣利園山道月租二千五住劏房，「其實嗰陣時二千五個價錢係好平，我都OK enjoy幾窮嘅生活，窮有窮嘅好！嗰時決定每一日嘅膳食費係一百蚊以下，我每日食兩餐，起身我唔食早餐，等到下午茶去登龍街茶餐廳，25蚊可以食到飯，仲送埋湯又有嘢飲，好大份量；夜晚再搵啲三十幾蚊嘅東西，淨係靠打工嘅錢都可以維持到生活。」
曾經想過放棄轉行，但Soko卻完全沒有想過離開香港。他對香港的認識，好大程度是受到媽媽影響，「我第一次對香港有興趣，係因為我媽媽嘅影響，因為我媽媽對於人權、女權、平等、和平，係好敏感嘅人。佢對社會有啲使命感，佢覺得唔啱就要發聲。我嘅家鄉，喺岡山縣一個郊區山入面，我媽媽夠膽自己組成一個自衞隊，福島核電廠有問題嘅時候，佢就喺郊區自己攞啲『確聲器』？嗰啲係咩？『大人公』？（大聲公！）係，攞啲大聲公喺我鄉下召集運動！」
我喺香港生活好自在
國際巨星要有國際視野，Soko對中國歷史都好有興趣，「我記得小學嘅時候，我哋三個，我有家姐同妹，佢（媽媽）叫我哋去睇『南京大屠殺』圖片展，佢叫我哋要留意吓，所以我對中國歷史有興趣。我大學嘅時候，都係揀咗中文（修讀中國語文）。我都有去南京睇抗日紀念館，我一個人去黑龍江參觀嘅時候，館入面嘅人好歡迎我，嘩，日本人嚟！」
媽媽常常對社會議題發聲，深深影響了Soko，「佢時時提醒我，一定要珍惜人權呢樣嘢，呢樣嘢係好緊要㗎！」去年香港發生的反送中運動，Soko都有表態，但最近港版國安法殺到，Soko都有擔心，「可能同其他香港人一樣，自我審查嘅程度，國安法通過咗之後更加嚴謹，不過都要繼續生存啦我哋，就算慢慢失去自由，但係你下一個step會點做呢？呢個係一個考驗。應該點樣行落去，真係好無奈，我𠵱家喺香港正正見證緊，我鍾意嘅香港變緊質，呢個真係好sad嘅一件事！」
香港變色了。當下的香港，仍是Soko追夢的地方嗎？「都係！因為香港，喺我曾經想放棄自己夢想嘅時候，佢又再次伸手畀希望同機會我，我好感謝。我覺得我自己冇天份做藝人，但係佢哋（香港人）仲畀機會我試。我每一次做完嘢，都會問自己做得好唔好，係咪可以令香港嘅觀眾滿足呢，我好擔心之後冇機會繼續做嘢，不過去到𠵱家呢一個地步，好感謝你哋（香港人）繼續畀機會我去做。」
生活在香港，才是Soko可以活出真我的地方。港日大不同，Soko最愛香港人的直接，「我喺香港生活好自在，感覺可以做返自己，呢個可能係你哋話畀我聽，我覺得你哋做返自己亦都好直接。日本人有時就算食到唔好食嘅嘢，佢哋都會話Oishi（好味），你哋唔係呀，嘩，咁難食嘅！我認為日本比較集體主義，香港人比較個人主義，更加珍惜自己嘅思想、自己嘅主張，自己想要乜嘢就做乜嘢，自己想做乜嘢就做乜嘢！」
但有可能漸漸變成難食都要講到好食。各種恐懼籠罩下，Soko說，生活還是要繼續，「我哋𠵱家最起碼嘅要求就係變咗生存，繼續生活落去，呢個之前係一個理所當然嘅一個道理，不過𠵱家就好似變得好珍貴嘅東西。」物以罕為貴，同國際巨星一樣呀！
生存，就要留返條命，慢慢玩。
【後記】港日交流
稱得上為國際巨星，自然要周身刀，YouTuber、主持、電台、電視、唱歌，Soko樣樣做勻，最近翻唱完《海闊天空》，下一首翻唱歌曲亦準備就緒，都是Beyond作品，但已是失去家駒年代的《十八》，隔代相傳由梁天琦翻紅，如今Soko再connect，大家明啦！
與Soko一起connect的，少不得小儀。「2月、3月嘅時候，我嘅工作幾乎完全冇晒，好彩電台節目keep住有，對我嚟講係一個希望，我非常之感謝小儀，我好多謝佢。小儀，你退休之後嘅生活，交畀我國際巨星，我養你！」小儀做女朋友？Soko笑說：「小儀一直都拒絕我，但係女人嘅心係好難觸摸，口是心非！」
這個港日交流之選，交得過吧！
場地提供：銅鑼灣迷你酒店
