炎炎夏日，香港書展被迫延期避炎。買書不一定要去書展，留家防疫更需要多看書解悶。然而，港區國安法立法至今不到半個月，香港的出版自由已被圈上套索，越收越緊，有人高呼，焚書坑儒時代降臨。當政權容不下異見論述，會否有日連讀書也成了犯人？
《蘋果》邀請了多位惜書的文化人，分別推介書本予一眾高官與抗爭者，有人以古鑑今，對照官員今日所為，同時寄語抗爭者讀書養志，撥開雲霧。
記者：陳詠恩
攝影：夏家朗 王子俊 謝榮耀 王瑋彤
吳靄儀4月中被警方以「組織及參與一個違反《公安條例》的未經批准集結」被捕，由大律師身份一下子變成被捕人，記者邀請她介紹書予抗爭者，吳靄儀一口答應，至於是甚麼類型的抗爭者，前線衝衝子、和理非，抑或流亡異地港人？「到咗呢個地步，其實我哋所有人都係抗爭者，因為我哋冇人接受呢個送中條例，亦冇人接受國安法，都覺得係用嚟限制我哋自由、言論、思想嘅工具，除非我不問世事，否則你遲早都係一個抗爭者。」
她說法治沒有光環，「我哋呢代人由頭到尾都知爭取法治係一樣好辛苦嘅嘢，法治係要好多人每一步都做啱，你先會得到完善嘅法治，但呢個過程入面，做啱嘢嘅人好少，做錯嘢嘅人好多。」
聽吳靄儀說書猶如回到大學講堂，她溫和而有力地說出一字一句，治癒人心。「運動去到某個點係需要反思，我哋喺書本中沉澱神經，從其他人身上學習。」她推介阿果寫的《失聲香港》，記者阿果酷愛研考流行文化，吳靄儀笑言自己對流行歌手一竅不通，「佢講啲我從未聽過嘅明星，喺逆境中點去奮鬥、掙扎，我哋成日諗一啲痛苦係好巨型嘅，例如耶穌受難、曼德拉坐監，其實喺平常人平常生活都有好多痛苦。」她發現很多年輕抗爭者都熟悉流行歌手，對他們的經歷有共鳴，透過阿果的文字，她窺探了抗爭者的內心。
籲買書論書支持敏感書
原先阿果研究香港人由雨傘運動時極熱衷政治、到運動後抗拒接收時事資訊的狀態，但寫到後期，反送中運動爆發，新聞重新走入生活最重要部份，國安法立法後，香港會否再次失聲？吳靄儀認為，香港人剛開始或者會說話少了、小心了，但慢慢會找到自己的語言，「香港到時會行入新階段，嗰時就會係我哋真正爭取自由嘅開始。」即使有人離開也不代表抗爭停止，她形容香港好似水，「當你有嘢壓落嚟，水花四濺，彈出去嘅水花可能係我哋嘅生命線。歷史上最受壓迫嘅民族係猶太人，當佢哋散播到全世界時，佢哋有佢哋嘅力量，可能呢個亦係香港將來嘅力量」。
吳靄儀分享讀書心得，她喜歡夾雜看不同類型的書，不一定要看很政治學、社會學沉重著作。她又推介其前議員助理陳偉雄所寫的《經歷太相同——讀中國歷史看聖經故事》，書中將中國歷史和鮮為人知的聖經故事放在一起，尋找共通點，「可能係我職業病關係，我樣樣嘢都要好認真對待，寫得好仔細，有時難免好長篇，講到人瞌晒眼瞓」，她佩服陳偉雄具天份，以簡潔文筆寫出有趣故事。
有書展商擔心政治著作會觸碰國安法紅線，打算收起敏感書不賣，吳靄儀說理解書商決定，尤其小書商資金有限，一旦被禁要蝕本，不過讀者可以幫忙，「我哋要幫佢克服佢嘅擔心。買囉！幫襯佢哋買囉，或者訂囉！書內容係乜，討論囉！如果今年書展係最後自由嘅書展，我哋大街小巷會有更多、更自由嘅書展」，毋須貿發局或政府安排，走進見山書店、序言書室、田園書店等一家家獨立書店，都有小型書展。