昨天我宣布不參選立法會後，朋友紛紛表示關心，但更多的是黑人問號：「馮翁，你幾時話過要參選呀？」我答：「為咗避免市民反對，所以我事先唔會披露參選意願，諗住當選後先宣布參選啫。畀我靜靜地贏好唔好？」
友人問：「你唔宣傳又點贏呢？」我答：「之前國安法都冇宣傳，咪一樣有三百萬人仆倒支持？反正我都唔選，唔怕話個必勝秘訣你知：我爭取支持嘅對象，就係舊年區議會過百萬冇投過票、冇表過態嘅選民。佢哋肯定係世外高人，法治崩於前而色不變，亦唔buy任何選舉宣傳。只要有人開發到呢片深不可測嘅深藍海，仲唔係票神？」
友人說：「了解。你嘅選舉策略咁鬼馬，唔去馬真係可惜。」我答：「唔可惜，我年紀大，應該彈開。世界變得太快，我適應唔到。呢期聽講話立法會議員唔可以反對政府，咁即係等於祖國嘅電影工作者，拍愛情片唔可以咁甜蜜、拍恐怖片唔可以咁恐怖，點做呀？何況我又唔打得又唔talk得，最大鑊係有拖延症，陣間話我拉布屈我顛覆政權，咪死得？」
友人問：「七月十八號係提名期開始，你有咩想同參選者講？」我答：「冇，不過我有兩樣嘢想問選管會。一、選管會上載嘅『確認書』，要求候選人確認明白擁護基本法，包括擁護基本法第一條、第十二條、第一百五十九（四）條。咁講法好有問題。唔通『明白擁護基本法』，淨係明白呢三條就夠？其他唔使明唔使擁護？我認為選管會應該寫『我明白擁護基本法，就是擁護基本法所有條文』；如果選管會鍾意，可以成部基本法抄一次落去。
「二、已經納入基本法附件三嘅港區國安法，確認書完全冇提。奇怪嘞，之前曾國衛話你反對國安法，就可能證明你唔效忠特區政府，做乜𠵱家縮呢？唔通曾鈺成真係點中死穴，篤爆咗國安法抵觸基本法嘅地方，冇人解到個死結？如果確認書叫你支持國安法，你可以問返選管會：『國安法第五十六條係咪抵觸基本法第十九條？如果係，咁所有支持國安法嘅候選人，就係唔擁護基本法，咪全部DQ？』我想問選管會：你支唔支持國安法，包括第五十六條呢？請確認。」