陳志雲除了頻道節目，近日又有新搞作，將與石詠莉、莫竣名（Louis）和劉亭君（Ivy）等合演處境網劇《姨媽到》，他會反串飾演女鬼Margaret Elizabeth Dunn，不過此處境劇涉及「八九六四」、「慘死」、「冤魂」等內容，隨時有機會觸犯早前生效的港區國安法，志雲聞言笑說：「我係鬼嚟㗎，點會踩界啫，一啲界都冇踩。喺社會大環境之下，你會知道我哋好貼地，但說話同劇情發展，叫人去示威、分裂國家、叛逆，呢啲意識係冇嘅，我哋唔推廣嘅。只係佢哋劇中間咖啡店展示咗啲相，係香港發生過嘅嘢，記者影嗰啲相。」
逗港人開心
志雲所演的女鬼塑造到巧合地在1989年6月4日之後死去，他解釋：「我89年移民英國，嗰年發生乜事，睇報紙就知，我驚㗎嘛，咪移民囉，點知我連凳都未坐暖，就俾人用咖啡壺鑿死我，我又唔知邊個殺我，我咪唔肯走，依附咗喺咖啡壺裏邊。」咖啡壺輾轉落入一間名為Imado的咖啡店，諧音「姨媽到」，志雲角色是大姨媽，因此一叫「姨媽到」便立即現身。而Louis指新劇內容主要講疫情，他強調：「我哋連口號都冇嘅。」港台《頭條新聞》受打壓已於上月停播，現推出《姨媽到》是否有意接棒？Ivy否認說：「個疫情一開始我哋就計劃，諗啲嘢等香港人開心吓。」志雲笑說：「受疫情影響啲話劇演員邊有得開工箒？如果冇得開工，我咪可以剝削佢哋，叫佢哋收平啲做。志雲投資，佢儍㗎，明明冇回報，不過你老闆（黎智英）嗰種儍仲危險，隨時俾人拉，我呢種最多蝕晒箒。」
近日傳出內地廣電局再新增20條禁令，包括愛情戲不能太甜蜜、穿越題材要有「合理科學解釋」及同性戀題材要轉為友情等，志雲竟大讚這20條好到不得了：「我覺得廣電局用心良苦，冇根據你都要作到有根據，而且仲要係可信性，咁嘅例都諗得出嚟，你話係咪好有創意？」他透露以前在無綫工作時跟內地合作，也曾領教過內地的「嚴格要求」：「拍完《歲月風雲》畀佢哋審閱，係城市劇，但內地竟話個劇嘅opening太城市化，城市劇太城市化，我哋都揣摩咗好耐，結果又可以揣摩到令到佢冇咁城市化，同理兄弟之間唔可以相殘，惡人一定要受到懲罰。」
鬧無綫加辣
無綫對藝人合約也傳加辣，若藝人因個人行為、言論、政治立場等令公司蒙受損失，藝人要承擔責任及賠償，志雲鬧爆：「唔公道，點可以咁，人哋有自己思想，我嚟賣藝唔係賣身，唔係將個靈魂賣咗畀你。如果我哋公司喺內地發展好緊要，而你講啲嘢令到公司尷尬，我哋內部唔能夠再用你係明白，但唔使寫埋喺合約度，點賠畀你箒？最多話炒佢，已經係最嚴重嘅懲罰。」暫定七集的《姨媽到》將於本月27日王喜53歲生日及志雲母親死忌當天，在志雲YouTube頻道播出。