熱刺周三憑哈利卡尼梅開二度，射入球會生涯嘅第200同201個入球，喺英超作客以3:1擊敗紐卡素，賽後領隊摩連奴大讚呢位英格蘭射手不可思議。26歲嘅哈利卡尼喺球會生涯350場比賽累積射入201球，當中有185球係喺熱刺射入，摩連奴話︰「哈利卡尼知道佢幾咁重要，佢實在不可思議。傷患康復後，佢踢足每場比賽嘅每一分鐘，呢場係只有2日休息時間嘅第4場比賽，佢付出咗一切。」今場比賽亦係摩連奴執教生涯首次喺英超領軍作客擊敗紐卡素，之前佢帶隊7次作客聖占士公園球場嘅戰績係3和4負。至於卡尼就話︰「350場聯賽射入201球，真係唔錯！好高興可以達到呢個里程碑，但分數先係最重要。」